सारण बनवण्यासाठी तीळ, सुकं खोबरं आणि खसखस कोरडीच, निरनिराळी भाजून घ्यावी. गार झाले कि मिक्सरमध्ये सरसरीत दळून घ्यावे..

कढईत तेल गरम करून त्यात हिंग हळद घालावे. कांदा आणि बारीक चिरलेली लसूण घालून परतावे. कांदा चांगला परतला गेला कि बाजूला काढून ठेवावा आणि गार झाला कि मिक्सरमध्ये वाटावा. वाटताना घरगुती लाल तिखट आणि मीठही घालावे. वाटलेले कांद्याचे मिश्रण आणि तीळ सुकं खोबऱ्याचे मिश्रण एकत्र करावे. चव पाहून लागेल ते जिन्नस घालावे.

सारण तयार झाले कि आवरण बनवायला घ्यावे. कढईमध्ये तेल गरम करून त्यात हिंग, हळद, जीरे, लसूण आणि हिरवी मिरची पेस्ट घालून परतून घ्यावे. एका मोठ्या बाउल मध्ये पाणी घालावे. पाण्यात मीठ घालावे. त्यात बेसन घालून पाण्यात बेसन पीठ नीट मिक्स करून घ्यावे. गुठळ्या होवू देउ नयेत. फोडणीमध्ये बेसन पीठ आणि पाणी मिक्स केलेले मिश्रण टाकावे ‌ मध्यम आचेवर २-३ वाफा काढाव्यात. पीठ शिजले पाहिजे. वाटल्यास थोडे खावून पहावे. कच्चट लागत असेल तर अजून थोडावेळ शिजू द्यावे किंवा पीठ हाताला चिकटत नाही हे बघावे ्

पीठ शिजले कि कोमट होवू द्यावे. नंतर हातानेच कॉटनच्या कपड्यांवरं मध्यमसर थापावे. यावर तयार सारणाचा पातळ थर द्यावा आणि घट्ट सुरळी करावी. शेवटचे टोक नीट चिकटवावे. वड्या पाडाव्यात.

कढईमध्ये तेल तापवावे त्यात मोहरी, जीरे आणि हिंग घालावे आणि घरगुती मसाला घाला आणि मिनिटभर परतवा. कांदा लसुण खोबरे वाटण आणि उरलेले सारण घालून मिक्स करावे. तेल सुटेपर्यंत चांगले परतून घ्यायचे. रस्सा बनवण्यासाठी पाणी घाला. पाणी घातल्यावर मोठ्या आचेवर रस्सा उकळून घ्या. त्यानंतर कढईला लागलेली खरवड,मीठ व कोथिंबीर घालून चांगले मंद गॅसवर पाच मिनिटे उकळून घेणे. मासवडी रस्सा तयार आहे.
वड्यांवर रस्सा टाकून बाजरीची भाकरी, चपाती किंवा भाताबरोबर त्याचा आनंद घ्या.