સૌથી પહેલા મીક્ષરમાં ૧ કપ પાણી લઈ, તેમાં તેલ, ખાંડ, હળદર, મીઠું અને લીંબુના ફુલ નાંખી, બધુ મીક્ષ કરી લેવું. પછી તેને એક મોટી તાવડીમાં કાઢી બાકીનું પાણી ઉમેરી હલાવી લેવું. ત્યારબાદ તેમાં ધીરે ધીરે ચાળેલો ચણાનો લોટ ઉમેરતા જવું અને હલાવતા જવું.

ખીરૂ સરળતાથી રેડી શકાય તેવું (વધારે પાતળું કે વધુ ઘટ્ટ નહિ) હોવું જોઈએ. હવે ગેસ ચાલુ કરી, મોટા તપેલામાં સ્ટીલનું સ્ટેન્ડ મુકી, પાણી રેડી ગરમ કરવા મુકવું. તેમાં ગ્રીસ કરેલ કેકટીન કે થાળી મુકી તપેલાને ઢાંકી ૧૦ મીનીટ પ્રી-હીટ થવા દેવું.

ત્યારબાદ તૈયાર કરેલ ખીરામાં સોડા લઈ, તેના પર ૧ ચમચી પાણી નાંખી એકતરફ ૧ મીનીટ હલાવવું. (ખીરૂ એકદમ ફ્લપી થશે અને રંગ થોડો આછો થશે) પછી તરત જ તેને પ્રી-હીટ તપેલામાં મુકેલ કેકટીન/થાળીમાં પાથરી તપેલાને ઢાંકી ૨૦-૨૫ મીનીટ થવા દેવું.
(નોંધ :- આ માપ બે કેકટીન/થાળીનું છે. તેથી જો તમે એક એક થાળી મુકવાના હો તો ખીરું અડધું અડધું કરી સોડા પણ અડધો અડધો નાંખી ખીરૂ તૈયાર કરવું.)

૨૦ મીનીટ પછી ચપ્પાથી ચેક કરવું. ચપ્પુ ચોખ્ખું નીકળે એટલે ગેસ બંધ કરી દેવો. ઠંડું થાય એટલે ચપ્પાથી ખમણ કાપી લેવા.

હવે ગેસ પર મોટી તાવડીમાં તેલ મુકવું. તેલ ગરમ થાય એટલે તેમાં રાઈ, હીંગ, લીલા મરચા, મીઠો લીમડો ઉમેરી - મીનીટ હલાવવું. પછી તેમાં પાણી અને ખાંડ ઉમેરી એક-બે ઊભરા આવવા દેવા. પછી ગેસ બંધ કરી એકાદ મીનીટ થોડું ઠંડું થવા દેવું. અને પછી મોટા ચમચાની મદદથી તેને કાપેલા ખમણ પર પાથરવું. છેલ્લે તેના પર કોથમીર ભભરાવવી.

આપણા સોફ્ટ સોફ્ટ, યમ્મી નાયલોન ખમણ તૈયાર છે.😋😋😋😋👌👌👌👌🥰🥰🥰

ટીપ્સ :- (૧) સામગ્રી માપ મુજબ જ લો. (૨) સામગ્રી બરાબર મીક્ષ કરો. (૩) તપેલા પર મુકેલા ઢાંકણા પરથી વરાળના ટીપા બનતા ખમણ પર ના પડે તેનું ધ્યાન રાખો. (૪) ખમણ ઠંડા થાય પછી જ કાપા પાડો. (૫) ખમણ પર વધાર નાંખ્યા પછી ૧૫ થી ૩૦ મીનીટ પછી ઉપયોગમાં લો. મારો અનુભવ છે કે એલ્યુમીનીયમની થાળી અથવા કેકટીનમાં ખીરું પાથરીને બનાવીએ તો ઝડપથી અને વધુ જાળીદાર બંને છે.