ઢોંસાનું ખીરું બનાવવા માટે, ચોખા,અડદની દાળ, અને મેથીને બરાબર ધોઇ ૪ કલાક માટે પલાળી લો. પછી તેને દહીં નાખી ને એકદમ બારીક વાટી લો. તેને હૂંફાળી જગ્યાએ આથો લાવવા ૬-૮ કલાક માટે ઢાંકીને મૂકી દો. એ પછી આપણું ઢોંસાનું ખીરું તૈયાર છે.

આલૂ મસાલા સબ્જી માટે, બટાકા ને વરાળથી બાફી છાલ નીકાળી ચોરસ ટુકડા માં સમારી લો. ડુંગળી ને લાંબી પાતળી સમારી લો.એક કઢાઇમાં તેલ ગરમ કરી રાઇ, હીંગ, મીઠા લીમડાનાં પાન, લીલા મરચાં નો વઘાર કરો. તેમાં ડુંગળી નાખી થોડી વાર સાંતળો. છીણેલું ગાજર નાખી હલાવી મિક્સ કરી લો. પછી તેમાં બધા સૂકા મસાલા લાલ મરચું પાઉડર, સંભાર મસાલો, હળદર, મીઠું ઉમેરી મિક્સ કરી લો. ઉપરથી કોથમીર નાખી મિક્સ કરી લો.મસાલો તૈયાર છે.

સંભાર માટે, તુવેર ની દાળને બરાબર ધોઇ મીઠું,સરગવાની શીંગ નાખી બાફી લો. બફાઇ જાય એટલે શીંગ કાઢી તેને રવાઇ ફેરવી વાટી લો. ડુંગળી,ટામેટા ને ઝીણા સમારી લો. આમલીને ૧/૪ કપ પાણી લઇ ગરમ કરી પલાળી લો.

એક કઢાઇમાં તેલ ગરમ મૂકી રાઇ હીંગ નો વઘાર કરો.તેમાં લીલું મરચું અને મીઠા લીમડાનાં પાન નાખી વઘારો. પછી તેમાં સમારેલું શાક ડુંગળી, ટામેટા,છીણેલું બીટ, દૂધી, રીંગણ,સરગવાની શીંગ નાખી હલાવી સંતળાવા દો. ચઢી જાય એટલે લાલ મરચું, સંભાર મસાલો, હળદર, મીઠું,ગોળ,ધાણા જીરુ પાઉડર ઉમેરી મિક્સ કરી લો. તેલ છૂટું પડે પછી બાફેલી દાળ ઉમેરી હલાવી મિક્સ કરી લો. પલાળેલી આમલીને મસળી, ગાળીને પલ્પ કે આમલીનું પાણી દાળમાં ઉમેરો. થોડીવાર ઊકળવા દો. ઉપરથી કોથમીર નાખી મિક્સ કરી લો. સંભાર તૈયાર છે.

બધી ચટણીની રેસીપી પ્રોફાઈલ માં અલગથી પોસ્ટ કરી છે.

ઢોંસા ના ખીરામાં મીઠું નાખી હલાવી મિક્સ કરી લો. ઢોંસા નો તવો ગેસ પર ગરમ મૂકો. તેમાં એક ચમચો ખીરું વચ્ચે રેડી ધીમે-ધીમે ગોળ ગોળ ફેરવી ફેલાવો. ઉપર નીલગીરી ફુદીનાની ચટણી બધી બાજુ પાથરી વચ્ચે આલૂ મસાલો મૂકી ૩ બાજુથી વાળી લો.નીલગીરી મસાલા ઢોંસા તૈયાર છે. એ જ રીતે કારા ચટણી લગાવી મૈસુર મસાલા ઢોંસા તૈયાર કરો. ચટણી ને મસાલા વગર કડક પ્લેઇન ઢોંસા ઉતારી લો.

જીની ઢોંસા માટે, ૩ ચમચી આલૂ મસાલો લઇ તેમાં ૧ ટેબલ ચમચી ચીલી સોસ અને ૨ ટેબલ ચમચી ટોમેટો કેચઅપ મિક્સ કરી લો. હવે તવા પર ખીરું પાથરી ઢોંસો બનાવી ઉપર આ સ્પ્રેડ લગાવો. ૧ ચીઝ કયુબ છીણીને બધી બાજુ પાથરી દો. હવે પીઝા કટરથી ઢોંસા ના લાંબા ૪-૫ ટુકડા કરી રોલ કરી લો. ગરમ રોલ પર થોડું ચીઝ મૂકો. જીની ઢોંસા તૈયાર છે.