ஒரு குக்கரில் உருளைக்கிழங்கை மூன்று விசில் விட்டு நன்கு வேகவைத்து தோலுரித்து நான்காக நறுக்கிக் கொள்ளவும். காலிஃபிளவரை கொதிக்கும் நீரில் சிறிதளவு உப்பு, மஞ்சள்தூள் சேர்த்து 10 நிமிடங்கள் வேக வைத்து வடிகட்டி எடுத்துக் கொள்ளவும். இஞ்சி,பூண்டு, பச்சைமிளகாய், கொத்தமல்லி, ஒன்னும் பாதியுமாக தட்டி வைத்துக் கொள்ளவும்.

ஒரு கடாயில் எண்ணெய் ஊற்றி கடுகு, உளுத்தம்பருப்பு, கருவேப்பிலை தாளித்து வெங்காயம் சேர்த்து வதக்கியப்பின் தட்டி வைத்துள்ள விழுதை போட்டு நன்கு பச்சை வாசனை போகும் வரை வதக்கவும். இதனுடன் தக்காளி,மஞ்சள் தூள், மிளகாய் தூள்,தேவையான அளவு உப்பு சேர்த்து வதக்கி வேகவைத்து உருளைக்கிழங்கு காலிபிளவர் சேர்த்து சிறிதளவு தண்ணீர் தெளித்து 5 நிமிடங்கள் மூடி வைக்கவும்.

5 நிமிடங்கள் கழித்து சிறிதளவு எண்ணெய் ஊற்றி கிளறி இறக்கினால் சுவையான கமகமக்கும் வாசனையுடன் காலிபிளவர் பொட்டேட்டோ பொரியல் தயார். இதனை அனைத்து வகையான சாதத்துடன் சேர்த்து சாப்பிட மிகவும் சுவையாக இருக்கும்.