ઇન્સ્ટન્ટ માવો બનાવવા માટે સૌપ્રથમ એક પેન માં 2 ટીસ્પૂન ઘી ઉમેરીને ઘી ગરમ થાય એટલે તેમાં દૂધ ઉમેરવું તરત જ એમાં મિલ્ક પાઉડર ઉમેરી બરાબર હલાવી લેવું જેથી બધું બરાબર મિક્સ થઈ જાય અને કોઈપણ પ્રકારના ગઠ્ઠા રહે નહીં. હવે બધું ધીમા તાપે ગરમ થવા દેવું અને સતત હલાવતા રહેવું જેથી કરીને મિશ્રણ તળિયે ચોંટી ના જાય. પાંચ મિનિટમાં આ મિશ્રણ જાડુ થવા માંડશે.

જ્યારે મિશ્રણ પેન પર ચોંટતું બંધ થઈ જાય અને એનો એક ગોળો બની જાય ત્યારે સમજવું કે માવો તૈયાર છે. હવે એમાં 2 ટીસ્પૂન ઘી ઉમેરીને પાછું બરાબર મિક્સ કરી લેવું અને ધીમા તાપ પર સતત હલાવતા પકવતા રહેવું. ધીમે ધીમે માવા નો ભૂકો જેવું બનતું જશે.

જ્યારે એકદમ સુકું થઈ જાય અને કણી દેખાવા માંડે ત્યારે તેમાં ૩ ટેબલસ્પૂન દૂધ ઉમેરી પાછું બરાબર હલાવી લઈને ધીમા તાપે પકાવતા રહેવું. જ્યારે બધું દૂધ ઊડી જાય અને માવો એકદમ કોરો થઈ જાય અને બ્રેડ ક્રમ્સ જેવું થઈ જાય ત્યારે ગેસ બંધ કરીને થોડું ઠંડું થવા દેવું. માવાનો રંગ ડાર્ક ગોલ્ડન બ્રાઉન થવો જોઈએ. પહેલેથી છેલ્લે સુધી ધીમો તાપ રાખવો ખૂબ જ જરૂરી છે કારણ કે વધારે તાપ હશે તો માવો બળી જશે અને એના રંગ અને સ્વાદ માં ઘણો ફરક આવી શકે.

હૂંફાળા મિશ્રણને મિક્સરમાં પાઉડર જેવું વાટી લેવું. હવે તેમાં દળેલી ખાંડ, ઈલાયચી અને જાયફળનો પાઉડર ઉમેરી બરાબર મિક્સ કરી લેવું. ત્યારબાદ તેમાં 6 ટેબલસ્પૂન દૂધ ઉમેરવું જેથી કરીને લોટ જેવું બંધાઈ જશે. દૂધ એકસાથે ઉમેરવું નહીં ધીરે ધીરે ઉમેરતા જવું જેથી વધારે ઢીલું ના થઈ જાય.

હવે માવાના મિશ્રણ ને એક સરખા 20 ભાગ માં વહેંચી ગોળ પેંડા વાળી લેવા. પેંડા ને બૂરુ ખાંડ માં રગદોળવા.

મથુરા પેંડાને બે દિવસ સુધી બહાર રાખી શકાય ત્યારબાદ અઠવાડિયા સુધી ફ્રિજમાં સ્ટોર કરી શકાય.