સૌ પ્રથમ બટાકા ને ધોઈને પ્રેશર કુકરમાં જરૂર મુજબ પાણી ઉમેરી મીડિયમ ગેસ ની આંચ પર ચાર સિટી વગાડી ને બાફી લો. હવે આ બટાકા ને ઠંડા પાડી તેને હાથ થી મસળી લો.

હવે આપણે મરચાં માં ભરવા માટે મસાલો બનાવીશું. એની માટે એક પેન માં તેલ ગરમ કરી તેમાં જીરું કકડાવી તેમાં હિંગ, મીઠા લીમડા ના પાન ના ટુકડા, જીના સમારેલા તીખા લીલા મરચાં, આદુની પેસ્ટ, અધકચરાં વાટેલા સૂકા આખા ધાણા ઉમેરી મિક્સ કરી થોડી વાર માટે સોતે કરી લો.

હવે આમાં જીની સમારેલી ડુંગળી ઉમેરી મિકસ કરી ડુંગળી નો કલર ગુલાબી રંગ નો થાય ત્યાં સુધી સોતે કરી લો. હવે આમાં નમક, લાલ મરચું પાવડર, હળદર પાવડર, ગરમ મસાલો, આમચૂર પાઉડર ઉમેરી બરાબર મિક્સ કરી લો.

હવે આમાં બાફેલા બટાકા નો માવો ઉમેરી બરાબર મિક્સ કરી લો. ત્યારબાદ આમાં ખાંડ અને લીલી કોથમીર ના પાન ઉમેરી બરાબર મિક્સ કરી ગેસ ની આંચ બંધ કરી લો. ને આ મિશ્રણ ને ઠંડુ કરવા મૂકી દો.

હવે આપણે મરચાં વડા માટે બેસન નું ખીરું બનાવીશું. એની માટે એક બાઉલ માં બેસન ઉમેરી તેમાં નમક, હળદર પાઉડર, લાલ મરચું પાવડર, અજમો અને ખાવાનો સોડા ઉમેરી બરાબર મિક્સ કરી લો. હવે આમાં થોડું થોડું પાણી ઉમેરતા જઈ ભજીયા નું ખીરું થોડું જાડું તૈયાર કરી લો.

હવે મોટા લીલા મરચાં ને ધોઈ ને કપડાથી સાફ કરી સૂકવીને તેને ચપ્પા થી વચ્ચે એક કટ લગાવી તેમાંથી બધા બીજ કાઢી નાખી તૈયાર કરી લો.

ત્યારબાદ હવે તૈયાર કરેલા મસાલા ને કટ કરેલા મરચાં માં એકદમ ટાઈટ ભરી લો. અને આ રીતે બધા મરચાં તૈયાર કરી લો.

હવે એક પેન મા તેલ ગરમ કરવા મૂકી દો. હવે આ ગરમ તેલ મા મરચાં ને બેસન ના ખીરા માં કોટ કરી ગરમ તેલમાં ઉમેરી ગેસ ની મીડિયમ આંચ પર ગોલ્ડન ફ્રાય કરી લો.

હવે આપણા એકદમ ક્રિસ્પી ને થોડા સ્પાઇસી એવા જોધપુરી મિર્ચી વડા તૈયાર છે સર્વ કરવા માટે. આ વડાને ગરમ ગરમ ચા કે કોફી સાથે દહીં ચાટ, ટોમેટો કેચઅપ અને લીલી ચટણી સાથે સર્વ કરી ખાવાની મજા માણો.