સૌપ્રથમ ચોખા, ચણા દાળ અને અડદની દાળને સારી રીતે ધોઈ 2 ચમચી દહીં અથવા છાસનું પાણી અને જરૂર મુજબ પાણી નાખી છ થી સાત કલાક પલાળી રાખવી. ત્યારબાદ તેને મિક્સર જારમાં લઈ સ્મૂથ પેસ્ટ બનાવી લેવી. બેટર પાતળું ન થઈ જાય તેનું ધ્યાન રાખવું અને આથો લાવવા માટે છ થી સાત કલાક ઢાંકીને રાખી દેવું.

હવે આથો આવી ગયો છે તો તેને બરાબર વિસ્ક કરી તેમાં મીઠું, મરચું, હળદર, ધાણાજીરું પાઉડર, આદુ લસણ મરચાની પેસ્ટ નાખી બરાબર મિક્સ કરી દેવું અને સ્ટીમરમાં પાણી નાખી ગરમ કરવા મૂકવું.

હવે બેટરમા તેલ અને સોડા નાખી બરાબર ફેટી તેલથી ગ્રીસ કરેલ થાળીમાં બેટર નાખી બે ચાર વાર ટેપ કરી સ્ટીમર માં સ્ટીમ કરવા માટે સાત થી આઠ મિનિટ માટે મીડીયમ ફ્લેમ પર મૂકવુ.

હવે ચપ્પુની મદદથી ચેક કરવું. જો ચપ્પુ ક્લીન નીકળે તો સમજવું કે ઢોકળા થઈ ગયા છે. ત્યારે નીચે ઉતારી મનપસંદ આકારના કટ કરી લેવા અને વઘારીયા માં તેલ મૂકી ગરમ થાય એટલે રાઈ, મીઠો લીમડો, મરચું અને તલ નો વઘાર કરી આ વઘાર ઢોકળા પર રેળી દેવો.

તો તૈયાર છે ઢોકળા. સર્વિંગ પ્લેટમાં કાઢી સર્વ કરો. સરસ લાગે છે.