सर्वप्रथम बांगड्यांच्या डोळ्याखालून पोटाकडे चिर मारून पोटातील घाण काढून घ्यावी. खवले असतील तर ते काढून मग बांगडे वाहत्या पाण्यात स्वच्छ धुवून घ्यावेत. शक्यतो बांगडे आख्खेच ठेवावेत. (दिसायला छान दिसतात) त्यासाठी लहान आकाराचे बांगडे असलेले जास्त छान. आता त्या बांगड्यांना हळद, मीठ, आगळ चांगले चोळून बाजूला ठेवावे.

मिक्सरच्या भांड्यात सुक्या संकेश्वरी मिरच्या, धणे, बडीसोप, त्रिफळ १० मिनीटे भिजत घालावे. १० मिनीटांनंतर त्यात खोवलेले ताजे खोबरे, लसूण पाकळ्या, कोथिंबीर, कच्ची कैरी आणि मीठ, (मीठ बेतानेच घालावे कारण आपण बांगडे मेरिनेट करताना मीठ घातलेले आहे) जरासे पाणी घालून अगदी छान बारीक वाटून घ्यावे. आता हा बारीक वाटलेला मसाला थोडा थोडा प्रत्येक बांगड्याला खालुन वरून लावून घ्यावा.

गॅसवर पॅन ठेवून त्यात तेल गरम करून मग त्यात ठेचलेला लसूण, कढिपत्ता पाने घालून एक एक बांगडा त्यात ठेवावा आता २-३ मिनीटे त्यावर झाकण ठेवून द्यावे. ३ मिनीटांनंतर झाकण काढून बांगडे हळुवारपणे उलटवून घ्यावे. आणि पुन्हा ३-४ मिनीटांसाठी झाकण ठेवावे. ५ मिनीटांनंतर झाकण काढून बांगडे पूर्णपणे शिजले आहे का याची खात्री करून गॅस बंद करावा. आपले चमचमीत "बांगड्याचे तिखले" खाण्यासाठी तयार.

बांगड्याचे तिखले आणि सोबत आंबोळ्या किंवा तांदळाची भाकरी सर्व्ह करावे. गरमागरम वाफाळता भात आणि तिखले सुद्धा अगदी जबरदस्त combination आहे. तर मग मंडळी एकदा नक्की करून पहा "बांगडयाचे तिखले"....

धन्यवाद 🙏☺️