तांदूळ निवडून दोन-तीन पाण्याने स्वच्छ धुऊन घ्यावा आणि पंधरा मिनिटे भिजत ठेवावा. त्यानंतर तांदळाच्या तिप्पट पाणी घेऊन एका भांड्यात गॅसवर उकळत ठेवावे. त्यात थोडेसे मीठ आणि किंचित तेल टाकावे. पाणी उकळल्यावर त्यात भिजलेले तांदूळ टाकावे. झाकण ठेवून दोन मिनिटे शिजू द्यावे. आणि अर्धवट शिजलेले तांदूळ बघून गॅस बंद करावा.

आता अर्धवट शिजलेल्या तांदळाला गाळणीने गाळून घ्यावे. वरून थोडे थंड पाणी टाकावे. म्हणजे भात मोकळा होतो. तांदूळ पूर्ण शिजलेला नसावा,याची काळजी घ्यावी.

आता आपण पालकाकडे वळूया. त्यासाठी पालक तोडून आधी दोन-तीन पाण्याने स्वच्छ धुऊन घ्यावा. त्यानंतर पालकाला ब्लांच करण्यासाठी एका भांड्यात गरम पाणी, थोडी साखर टाकून ठेवावे. त्यामध्ये एक मिनिट पालक टाकावा व ठेवावा. आणि त्यानंतर लगेचच त्यातून काढून तो पालक थंडगार पाण्यात टाकावा.

आता हा ब्लांच केलेला पालक, मिक्सर च्या भांड्यात टाकून त्याची प्युरी बनवून घ्यावी. अशा रीतीने अर्धवट शिजलेला भात आणि पालक प्युरी तयार आहे. आता पुलाव मध्ये टाकण्यासाठी एका भांड्यात तेल टाकून, त्यामध्ये सुरुवातीला काजू आणि बदाम टाकावे. खोबऱ्याचे काप टाकावे. किंचित परतल्यावर त्यातच किसमिस टाकावे.आणि गॅस बंद करावा.

आता एका भांड्यात तेल टाकून गरम झाल्यावर त्यात जीरे टाकावे. तेजपान, लवंग, मिरे, दालचिनी, विलायची टाकावी. किंचित परतल्या नंतर त्यात हिरवी मिरची, आले लसूण पेस्ट, तिखट, बिर्याणी मसाला, चवीनुसार मीठ आणि पालक प्युरी टाकून मिक्स करून घ्यावे. त्यानंतर त्यात अर्धवट शिजलेला भात टाकून हलक्या हाताने मिक्स करावा. आता त्यात परतलेला सुका मेवा टाकावा आणि पुन्हा एकदा मिक्स करून घ्यावे.

सुका मेवा मिक्स केल्यानंतर, झाकण ठेवून दोन मिनिटे वाफ काढून घ्यावी.आणि एक चमचा साजूक तूप टाकावे वरून..
आता पालक पुलाव तयार झालेला आहे. आता वरून कोथिंबीर टाकून गरमागरम सर्व्ह करण्यासाठी तयार आहे. मी यात पालकाचे प्रमाण कमी वापरलेले आहे. जास्त वापरले तर थोडा कडवटपणा येतो.पण आवडत असेल तर पालक जास्त वापरून छान हिरवा रंग येतो.