#cpm6

एकंदरच "भात"प्रिय गटात मी मोडत असल्याने वरणभातापासून कोणताही भाताचा प्रकार अगदी मनापासून आवडतो...करायलाही आणि खायलाही!!
पूर्वी फक्त आंबेमोहोर किंवा कोलम तांदळाचा भात खाल्ला जायचा.पुलावाला दिल्ली राईस लागे.तोही फक्त दिवाळीत वगैरे आमच्याकडे आणला जायचा.नंतर सर्रास बासमतीचेच कणी,दुबार,तिबार,सबंध long grain असे प्रकार वापरले जाऊ लागले.मग आंबेमोहोर तर फक्त बाळंतीणीसाठी उरला.त्यानंतर आता राजभोग,कालीमूँछ,लचकारी,मसुरी,सोना मसुरी,वाडा कोलम,इंद्रायणी आणि उकडा तांदूळ ह्यातील सर्व प्रकार मी आलटून पालटून आणते.असा हा तांदूळ साठवणीचा आणि वैविध्यपूर्ण तांदूळ घरात संग्रही ठेवण्याचा माझ्या वडिलांचा गुण मी घेतलाय.मऊ भाताला इंद्रायणी मस्त.पीठीसाठी आंबेमोहोर छान.पुलाव बिर्याणी साठी जुना बासमती सबंध.इडलीला उकडा.धिरड्यासाठी मसुरी.लचकारी,राजभोग,दिल्लीराईस पुलाव,बिर्याणी साठी,लचकारी,बासमती तिबार जीराराईस साठी....इतक्या प्रकारचे वैविध्य तांदळात असल्याने तांदळाच्या बाबतीत मी खूपच चोखंदळ आहे.
सुवासिक आणि लांब पांढरा शुभ्र सळसळीत असा भात,त्यावर जिऱ्यांची मुक्त उधळण आणि मधूनच डोकावणारी कोथिंबीर हा एवढाच साज ल्यायलेला हा जीरा राईस नेहमीच घरचे किवा रेस्टॉरंट मधले जेवण पूर्ण करणारा...त्याबरोबर एखादा दाल तडका,दालफ्राय किंवा ग्रेव्हीवाली सब्ज़ी !
हॉटेलमध्ये तर हा जीरा राईस सर्व्ह करतात ते सर्व्ह करताना बघण्यातही गंमत वाटते.दोन टेबलस्पून मध्ये भरपूर भरुन एकदम ष्टाईलमध्ये सरसर वाढणाऱ्या वेटर्सचे कौतुक वाटते!👌फार काही तामझाम नसलेली तरीही आवडणारी ही रेसिपी.