मिक्सरच्या भांड्यात साबुदाणा व भगर घालून बारीक पीठ करून घेणे.(१ कप भगर व १/४ कप साबुदाणा) मी याच्या निम्मे प्रमाण घेतले आहे.

हिरव्या मिरच्या बारीक चिरून घेणे. बटाटा व आलं किसून घेणे. कोथिंबीर ही बारीक चिरून घेणे. हे सर्व साहित्य एकत्र करून घेणे. चवीप्रमाणे मीठ, जीरे, शेंगदाण्याचा कूट घालून व्यवस्थित मिक्स करून घेणे.* (तुम्ही कोथिंबीर, जीरे,आलं,हे जर खात नसाल तर, ते पदार्थ नाही घातले तरी चालतील.)

भगर व साबुदाणा यांचे केलेली पीठ थोडे-थोडे घालून कणीक मळून घेणे. जेवढे पीठ बसेल तेवढे घालून घेणे.पीठ व्यवस्थित मळून, अर्धा तास झाकून बाजूला ठेवणे.

वाळलेल्या लाल मिरच्या गरम पाण्यात १५-२० मिनिटे भिजत ठेवणे. मिक्सरच्या भांड्यात भिजलेल्या मिरच्या काढून घेणे. त्यात शेंगदाणा कूट,मीठ,थोडीशी साखर घालून घेणे. थोडेसे पाणी घालून मिक्सरला फिरवून घेणे. थोडेसे बारीक झालेल्या मिश्रणात दही घालून, पुन्हा एकदा छान बारीक चटणी वाटून घेणे. एका बाऊलमध्ये चटणी काढून घेणे.

झाकून ठेवलेले पीठ एकदा व्यवस्थित मळून घेणे. त्याचे छोटे-छोटे गोळे करून, त्यांना लांबट आकार देणे. अशा प्रकारे सर्व नगेट्स तयार करून घेणे. गॅसवर कढईत तेल तापत ठेवणे. तेल तापले की गॅस मध्यम आचेवर ठेवावा. बसतील तेवढे नगेट्स तेलात घालून घेणे. लालसर रंगावर तळून घेणे. अशा प्रकारे सर्व नगेट्स तळून घेणे.(तळताना चे फोटो काढायचे राहिले.)

उपवासासाठी खास नगेट्स तयार! तयार चटणी सोबत हे नगेट्स खूप छान लागतात.