குக்கரில் பிடி கருணையை நன்கு மண் போக கழுவி, மூழ்கும் அளவு தண்ணீர் விட்டு 2 விசில் விட்டு அடுப்பை அணைத்து நன்கு ஆறவிடவும்

ஆறியதும் தோல் உரித்து கையால் நன்கு மசித்து ஒருசேர எடுத்துக் கொள்ளவும்

வெங்காயத்தையும், பச்சை மிளகாயையும் நன்கு பொடியாக நறுக்கி எடுத்துக் கொள்ளவும். அடி கனமான கடாய் அல்லது நான்ஸ்டிக் கடாயில் நல்லெண்ணெய் விட்டு காய்ந்ததும் கடுகு, உளுந்து தாளிக்கவும்

பிறகு கறிவேப்பிலை, பச்சை மிளகாய் சேர்த்து நன்கு வதக்கி விடவும். பிறகு வெங்காயத்தை சேர்த்து அடுப்பை குறைந்த தணலில் வைத்து நன்கு சிவக்க வதக்கவும்

வெங்காயம் வதங்கியதும் மசித்து வைத்துள்ள கிழங்கை சேர்க்கவும்

மிளகாய்த்தூள், மஞ்சள் தூள், சீரகத் தூள் தேவைக்கேற்ப உப்பு சேர்த்து நன்கு கரண்டியால் கிளறிவிடவும். குறைந்த தணலில் மிதமான தீயில் ஒரு 5 நிமிடங்கள் வேக விடவும். இதற்கிடையில் புளியை அது மூழ்கும் அளவு தண்ணீர் ஊற்றி ஊற விடவும்

இப்போது புளியை நன்கு கெட்டியாக கரைத்து கிழங்கில் சேர்க்கவும்

இப்போது அனைத்தையும் ஒரு சேர நன்கு கிளறி விட்டு குறைந்த தணலில் வைத்து, சுற்றிலும் எண்ணெய் பிரிந்து ஒட்டாமல் சுருண்டு வரும் வரை அடுப்பில் வைத்து கிளறிக் கிளறி விட்டு அடுப்பை அணைக்கவும். (தட்டு கொண்டு மூட கூடாது)