प्रथम चित्रात दाखविल्याप्रमाणे बनविण्यासाठी सगळे साहित्य घ्यावे.
आधी तांदूळ स्वच्छ धुवून साधारणपणे अर्धा तास भिजवून ठेवावा.
तोपर्यंत यखनी बनवून घ्यावी. एका टोपात पाणी उकळत ठेवावे. त्यात मीठ घालावे. आता एका स्वच्छ कपड्यात दिलेले सगळे साहित्य व्यवस्थित बांधून घ्यावे.

बांधलेल्या कपड्याची पोटली व चिकन त्या पाण्यात घालावे. त्यावर झाकण ठेवून १५ मिनिटे चांगले उकळवून घ्यावे.आता बांधलेली पोटली काढून घ्यावी. चिकन वेगळे काढून घ्यावे. आणि यखनी वेगळी ठेवावी. आपली यखनी तयार आहे.

पुलाव बनवताना एका मोठ्या कढईमध्ये तेल व तूप घ्यावे. गरम झाल्यावर प्रथम त्यात कांदा छान तळून घ्यावा. तळलेल्या कांद्यापैकी अर्धा कांदा बाजूला काढून ठेवावा.

आता त्या तेलात जीरे घालावे. जीरे तडतडले की त्यात आले लसूण पेस्ट घालावी. नीट परतवून घावे. त्यात बारीक चिरलेला टोमॅटो घालावा. एक मिनिटभर परतावे. त्यात हळद, लाल मिरची पूड, धणे पूड, गरम मसाला व मीठ घालून व्यवस्थित परतवून घ्यावे.

टोमॅटो एकदम मऊ शिजल्यानंतर त्यात दही व बडीशेप पूड घालून नीट मिक्स करावे. त्यात चिकन घालून मिक्स करावे. त्यात भिजलेले तांदूळ घालून अगदी हलक्या हाताने मिक्स करून घ्यावे.

आता त्यात तयार यखनी घालावी.
त्यावर झाकण न लावता ५ मिनिटे शिजवून घ्यावे. भात साधारण शिजवून घ्यावा.

भात साधारण शिजल्यानंतर त्यात तळलेला कांदा, तूप व पुदिना घालावा. त्यावर झाकण ठेवावे व ते झाकण पीठाने सील करून घ्यावे आणि मंद आचेवर १० मिनिटे शिजवावे.

आपला काश्मिरी यखनी पुलाव विथ चिकन तय्यार!!! रायत्याबरोबर गरमागरम सर्व्ह करावे.