Farko na jiƙa yeast 2spoon a ruwan ɗumi na ajiye shi gefe.

Saina zo na auna flour rabin kwano na tankaɗe na zuba bakin powder cokali ɗaya,sugar kaɗan da gishiri ma kaɗan sai mai cokali uku.

Na juya sannan na kawo ruwan ɗumi na yeast dana jiƙa na zuba wanda dashi nayi kwaɓin gaba ɗaya, naita bugawa har sai da yayi very soft kaurin bai kai na fanke ba kuma bai kai na funkaso ruwa ba, nayishi yanda zan iya gutsura idan na ɗagasa.

Bayan nan saina rufe na sanya shi a rana zuwa minti 45 saina ɗauko lokacin ya hau sose.

Dama na wanke gwangwanaye na shafa masu butter aciki saina dinga ɗibo wannan kwaɓin ina zubawa amma bada yawa ba saboda zai kumburo ne.

Bayan na gama zubawa a gwangwanaye saina sanya tukunya na zuba ruwa a ƙasa nasa murfi ƙarami na rufe ruwan saina ɗauƙo alkubus ɗin na jera sannan na sami buhu na rufe saman tukunyar na kumasa murfi na rufe na barshi ya tira ban sauke ba har saida na fara jin ƙamshinsa tukunna na buɗe na ciccire.

Miyar kuma na markaɗa kayan miya banda tumatir saina zuba mai na soya.

Daya soyu na kawo tafannuwa dana daka na zuba na sanya ruwa kaɗan na barta ta dahu for 2mints saina zuba kayan maggi da cow-skin na sanya ruwa bada yawa ba saina rufe.

Na ɗau agushi na zuba a bowl na sanya masa ruwa na dama shi sannan na buɗe miyar na zuba aciki haɗe da alayahu da curry na motsa ba juyawa nayi ba na dai sa spoon na motsa gefe da gefe.

Minti uku na kashe gas, ban buɗe miyar ba na barta ta sake tirara tukunna na buɗe na juye a flask.