तांदूळ आणि स्विटकाॅर्न धुवून घेतले. कांदे आणि टोमॅटो बारीक चिरुन घेतले. बटाट्याच्या फोडी करुन घेतल्या. मिक्सर मधे आलं लसूणचा जाडसर ठेचा वाटून घेतला.

कुकर मधे तेल घालून मग त्यात तूप घालावे म्हणजे तूप पटकन करपत नाही. नंतर त्यात फोडणी साठी जीरे आणि हिंग घालून बारीक चिरलेला कांदा घालून ब्राऊन होईपर्यंत परतला, मग त्यात बारीक चिरलेला टोमॅटो घालून परतून त्यात तिखट पूड, धणे-जीरे पावडर, गरम मसाला पावडर, गोडा मसाला, मीठ, साखर घालून चांगले परतले. त्यात स्विटकाॅर्नचे दाणे आणि बटाट्याच्या फोडी घालून मिक्स केले.

मग त्यात धुतलेले तांदूळ घालून परतले. तांदळाच्या अडीच पटीने पाणी घालून मिक्स केले. तीन वाट्या तांदूळासाठी सात वाट्या पाणी घातले. आणि दोन शिट्या काढून शिजवून घेतले.