કોર્ન રવા હાંડવો (Suji Corn Handvo recipe in Gujarati)

સોજી ને મિક્સરમાં પીસીને થોડીક ઝીણી કરી લેવી. જો રવો લો તો સીધો વાપરી શકાય. સોજી ને એક બાઉલમાં કાઢી લેવી. પછી તે જ મિક્સર જારમાં મકાઇના દાણા અને અડધું દહીં નાખી અધકચરું વાટી લેવું. બાકીનું દહીં ઉમેરી ફરી ફેરવી લેવું.

સોજીની અંદર દહીં વાળું મિશ્રણ ઉમેરી મિક્સ કરી લેવું. 1/4 કપ જેટલું પાણી નાખી મિક્સ કરી લેવું. 10 મિનિટ માટે રાખી મૂકવું. પછી તેમાં આદું લસણ મરચાં ની પેસ્ટ, લાલ મરચું પાઉડર, હળદર, ધાણાજીરુ પાઉડર,મીઠું, ખાંડ, લીંબુનો રસ ઉમેરી હલાવી બરાબર મિક્સ કરી લેવું. પાણી જરૂર લાગે તો થોડું ઉમેરવું.

સમારેલી કોથમીર પણ અંદર નાખી લેવી. એક વઘારીયામાં 1 ટેબલ સ્પૂન જેટલું તેલ લઇ રાઇ, હીંગ નો વઘાર કરવો. આ વઘારને ખીરામાં ઉમેરી બરાબર મિક્સ કરી લેવો.

હવે એક નોનસ્ટીક પેનમાં 1 ચમચી જેટલું તેલ નાખી પેનને ગરમ થવા મૂકવું. ખીરામાં ઇનો નાખી તરત હલાવવું. 1 મિનિટ ની અંદર ફીણ થાય તેવું જ ખીરાને પેનમાં રેડી દેવું.

બરાબર સ્પ્રેડ કરીને ઉપર તલ અને શીંગદાણા ભભરાવવા. પછી ઢાંકીને ધીમા તાપે 5-7 મિનિટ ચડવા દેવો.

પડ ચડી જાય પછી તવેથાથી સાચવીને હાંડવાને પેનમાં ઉલ્ટો કરી લેવો. હવે બીજું પડ મિડિયમ તાપે ઢાંક્યા વગર ચડવા દેવું. બરાબર શેકાઇ જાય અને કલર આવે એટલે પેનમાંથી કાઢીને પ્લેટમાં લઇ લેવો. ઉપર છીણેલું ચીઝ પાથરવું. 5 મિનિટ માટે ઠંડો થવા દઇ કટરથી ટુકડા માં કાપીને ચટણી, કેચઅપ, ચા સાથે સર્વ કરવો.

આ માપથી એક હાંડવાનો રોટલો બનશે. મકાઈના દાણાની સાથે બીજું શાક પણ છીણીને કે ચોપ કરીને લઇ શકાય. કોર્ન નો સરસ સ્વાદ આવે તે માટે મેં ફક્ત તે જ ઉમેર્યું છે.