સૌથી પહેલા બધા શાકભાજીને ચોખ્ખા પાણી થી ધોઈ લેવા. પછી બટાકા, વટાણા, ગાજર, ફ્લાવર અને બીટ સુધારી લીધા પછી તેને કુકરમાં બે સીટી વગાડી બાફી લેવા. બફાઈ ગયા બાદ તેનો છૂંદો કરી લેવો.

એક પેનમાં બટર લઈને તેમાં સૌથી પહેલા આદુ-મરચા-લસણની પેસ્ટ, ઝીણા સમારેલા કાંદા નાખીને સાંતળો. ત્યારબાદ તેમાં કોબીજ અને કેપ્સીકમ નાખવા તે સંતળાઈ જાય પછી તેમાં ઝીણા સમારેલા ટમેટા નાખવા. એકસરખું સંતળાઈ જાય પછી તેમાં થોડી કોથમીર, પાંવભાજીનો મસાલો, હળદર, લાલ મરચું અને મીઠું નાખવું.

હવે તેમાં બાફેલાં શાકભાજી નાંખીને એક સરખી રીતે તેને મિક્સ કરો અને થોડીવાર ઢાંકીને તેને એક સરખી રીતે ચઢવા દો. જરૂર પ્રમાણે પાણી ઉમેરો. સ્વાદ પ્રમાણે લીંબુ ઉમેરી શકાય.

પાંવ ને બટરમાં શેકી લો. પેનમાં બીજું થોડું બટર લઈ તેમાં લાંબા સમારેલા લાલ કેપ્સીકમ, લીલા કેપ્સિકમ લાંબુ સમારેલું ગાજર, ફણસી નાખો. તેની પર ઓરેગાનો, મિક્સ હર્બ, ચીલી ફ્લેક્સ અને મીઠું ભભરાવીને સામાન્ય સાંતળવું.