સૌ પ્રથમ પલાળેલા મસૂર ને મીઠું નાખી કુકર માં ૩ - ૪ વિસલ વગાડી બાફી લેવા. બીજા એક પેન માં પાણી ગરમ મૂકી ઊકળે એટલે તેમાં ચોખા અને થોડું મીઠું નાખી થવા દેવું. ચોખા ૯૦ % જેવા ચઢી જાય એટલે તેને ચારણી માં કાઢી લેવા.

એક પેન માં ઘી, તેલ લઈ ગેસ પર મૂકવું. ગરમ થાય એટલે તેમાં લવિંગ, તજ, મરી, ઈલાયચી, વઘાર નું મરચું, તમાલ પત્ર નાખવા. સમારેલ લસણ નાખી સાંતળવું. ડુંગળી નાખી ૨ - ૩ મિનિટ સાંતળવું અને ત્યાર બાદ મરચા ની ચીરી અને ટામેટા નાખી સાંતળવું. ટામેટા ચઢી જાય ત્યાં સુધી.

પછી તેમાં હળદર, લાલ મરચું પાઉડર, ધાણાજીરું, બિરયાની નો મસાલો, સ્વાદ અનુસાર મીઠું નાખી સાંતળી લેવું. ત્યાર બાદ તેમાં બાફેલા મસૂર, લીલા સમારેલા ધાણા અને ફુદીનો નાખી હલાવી બરાબર મિક્ષ કરવુ અને ગેસ ઉપર થી ઉતારી બાજુ પર મૂકવું.

હુંફાળા દૂધ માં કેસર નાખી હલાવી કેસર વાળું દૂધ તૈયાર કરવું. એક માઈક્રોવેવ પ્રુફ બાઉલ માં પહેલા ભાત નું લેયર કરવું. ઉપર કેસર વાળું દૂધ થોડું થોડું ચમચી થી રેડવું. ત્યાર બાદ ઉપર સમારેલા લીલા ધાણા અને ફુદીનો ભભરાવવા.

ત્યાર બાદ તેની ઉપર મસૂર વાળું લેયર કરવું. તેની ઉપર કેપ્સિકમ ની ચીરીઓ મુકવી. ફરી થી ભાત નું લેયર અને ત્યાર બાદ ફરી મસૂર વાળા મિશ્રણ નું લેયર કરવું. હવે છેક ઉપર પ્લેન ભાત પાથરી તેની ઉપર કેસર વાળું દૂધ, ધન અને ફુદીની ભભરાવવા.

હવે આ બાઉલ ને માઈક્રોવેવ માં ૧૦ મિનિટ માટે મૂકવું. થઈ જાય એટલે બહાર કાઢી આ સ્વાદિષ્ટ મસૂર ની બિરયાની ને ફુદીના ના રાયતા સાથે ગરમ ગરમ પીરસવી.