સૌ પ્રથમ ચોખા ને ૨ પાણી થી ધોઈ ને ૧૫ મિનિટ ચોખા પાણી માં પલાળી રાખો. એક નાના તપેલા માં ૧-૨ ગ્લાસ પાણી ગરમ કરવા મૂકી તેમાં મીઠું, લીલા વટાણા અને બટાકા ના નાના ટુકડા નાખી અધકચરા બાફી લો. જેથી પાછળ થી ચડતા વાર ના લાગે.

એક બીજા તપેલા માં પાણી ગરમ કરવા મૂકી તેમાં ચોખા રાંધવા મૂકી દો. ચોખા થવામાં ૫ મિનિટ ની વાર હોય એટલે કે ચોખો થોડોક કચો હોય એટલે તેને એક ચટણી માં નિતારી ને એક પહોળી થાળી માં કે વાસણ માં ખુલા કરી દો.

હવે એક મોટી કડાઈ માં અથવા મોટો તવો હોય તો તેમાં ૨ ચમચી બટર અને ૨ ચમચી તેલ ગરમ કરો. તેલ ગરમ થઈ એટલે તેમાં આદુ મરચાં નાખીને ૧ મિનિટ સુધી રહેવા દો. પછી તેમાં કાંદા,ફણસી, કેપ્સીકમ,ગાજર ના જીના સમારેલા કટકા નાખી બરાબર હલાવી ને ૫ મિનિટ ચડવા દો. બધું શાક ચડવા આવે પછી તેમાં ટામેટા ઉમેરી સ્વાદ મુજબ મીઠું અને એક ચમચી પાઉંભાજી મસાલો અને કસુરી મેથી નાખી ટામેટા ચડે ત્યાં સુધી સાંતળો. (વધારે તીખા કરવા હોય તો ૧ ચમચી મરચું પાઉડર નાખી શકાય)

હવે તેમાં બાફેલા બટાકા અને વટાણા નાખી બરાબર મિક્સ કરો અને જો શાક આખું દેખાતું હોય તો મેસર થી થોડું મેસ કરી શકાય (વધારે મેસ ના કરવું, કયું શાક છે તે ઓળખવું જોઈએ)

હવે એક ચમચી ટોમેટો સોસ નાખી ને ૧ મિનિટ સુધી સાંતળો પછી તેમાં અડધા ભાત ઉમેરી ને બરાબર મિક્સ કરો પછી વધેલા બીજા ભાત નાખી ફરીથી બરાબર મિક્સ કરી ૧ મિનિટ ચડવા દેવું અને લીલા ધાણા નાખી દેવા. તૈયાર છે આપણા તવા પુલાવ. સર્વ કરતી વખતે લીંબુ ભાવે તો નાખી શકાય. (નોંધ: સર્વ કરવાના ૪-૫ કલાક પેલા બનાવી ને પછી તેને ગરમ કરી ને સર્વ કરવાથી વધારે ટેસ્ટી લાગે છે)