સૌ પ્રથમ અડદની દાળ અને ચણાની દાળને ધોઈ લેવી. એક કૂકરમાં બંને દાળ, હળદર, મીઠું, આદુ, લસણ અને ત્રણ કપ પાણી ઉમેરવું. દાળ ને વીસ મિનિટ માટે મિડિયમ તાપ પર બાફી લેવી. કુકર ને એની જાતે ઠંડું થવા દેવું. અડદની દાળને બદલે આખા અડદ પણ વાપરી શકાય જે પાંચથી છ કલાક માટે પલાળી રાખવા.

એક પેનમાં ઘી ગરમ થાય એટલે તેમાં તજ, તમાલપત્ર અને જીરું ઉમેરવું. જીરુ બ્રાઉન કલરનું થાય એટલે તેમાં ઝીણા સમારેલા કાંદા, આદુ, લસણ અને મરચા ઉમેરવા. કાંદાને હલકા ગુલાબી રંગના સાંતળવા. હવે તેમાં લાલ મરચું, ધાણા જીરું અને મીઠું ઉમેરી 1 મિનીટ માટે સાંતળવું. ટામેટાના કટકા ઉમેરીને ટામેટા પોચા થાય ત્યાં સુધી પકાવવું. હવે તેમાં ગરમ મસાલો અને બાફેલી દાળ ઉમેરીને બરાબર હલાવી લેવું.

દાળમાં એક કપ પાણી ઉમેરીને મીડીયમ તાપ પર ૮ થી ૧૦ મિનીટ સુધી પકાવવી. દાળને વચ્ચે-વચ્ચે હલાવતા જવું અને ચમચાની મદદથી દબાવતા જવું જેથી કરીને દાળ એકદમ એકરસ અને ક્રીમી બનશે. લીલા ધાણા ઉમેરી ગેસ બંધ કરી દેવો. પાણી પસંદગી પ્રમાણે વધારે ઓછું રાખી શકાય.