એક પેનમાં કોપરા સિવાયના કોલ્હાપુરી મસાલા ના બધા મસાલા ઉમેરીને ધીમા તાપે શેકી લેવા. હવે તેમાં છીણેલું કોપરું ઉમેરીને 1/2મિનિટ માટે ધીમા તાપે શેકી ને ગેસ બંધ કરી દેવો અને બધા મસાલાને એકદમ ઠંડા થવા દેવા. ત્યારબાદ મિક્સર જાર માં ઉમેરીને આ મસાલાને વાટીને બારીક પાઉડર બનાવી લેવો.

એક પેનમાં 2 ટેબલસ્પૂન તેલ ગરમ થાય એટલે તેમાં કેપ્સિકમ અને વટાણા સિવાયના બધા શાકભાજી ઉમેરીને હાઇ હીટ પર ૩ થી ૪ મિનીટ માટે સાંતળી લેવા. હવે તેમાં કેપ્સિકમ અને વટાણા ઉમેરીને એક મિનીટ માટે સાંતળી લેવું. સાંતળેલા શાકભાજીને અલગ રાખવા.

હવે એજ પેનમાં 2 ટેબલસ્પૂન તેલ ઉમેરીને તેમાં આદુ, લસણ અને કાંદા ઉમેરી ને કાંદા ગુલાબી રંગના થાય ત્યાં સુધી સાંતળવા. હવે તેમાં ટામેટાના ટુકડા, કાજુ, મગજતરી અને 1/2 કપ પાણી ઉમેરી બધું બરાબર હલાવી લઈને ત્યાં સુધી ટામેટા એકદમ પોચા થઇ જાય ત્યાં સુધી મીડીયમ તાપ પર પકાવવું. આ મિશ્રણને એકદમ ઠંડુ થવા દેવું.

હવે કાંદા અને ટામેટાં નાં મિશ્રણને અડધા કપ પાણી સાથે મિક્સરમાં ઉમેરીને મુલાયમ પેસ્ટમાં વાટી લેવું.

એક પેન માં તેલ અને બટર ઉમેરી ને તેમાં તજ, તમાલપત્ર અને એલચો ઉમેરવા. હવે તેમાં હળદર અને લાલ મરચું ઉમેરી ને હલાવી લેવું. ત્યારબાદ તેમાં તૈયાર કરેલી કાંદા ટામેટાની ગ્રેવી ઉમેરવી. બધું બરાબર હલાવી લઈને મીડીયમ તાપ પર 5 મિનીટ માટે પકાવવું.

હવે તેમાં તૈયાર કરેલો કોલ્હાપુરી મસાલો 2.5 ટેબલસ્પૂન ઉમેરીને બરાબર હલાવી લેવું. જરૂરિયાત પ્રમાણે મસાલાનું પ્રમાણ વધારે કે ઓછું રાખી શકાય. મીડીયમ તાપે ત્રણ થી ચાર મિનિટ સુધી પકાવીને તેમાં મીઠું અને સાંતળેલા શાકભાજી ઉમેરી દેવા.

બધુ બરાબર હલાવી લઈને તેમાં એક કપ પાણી ઉમેરીને ઢાંકીને શાકભાજી લગભગ ચડી જાય ત્યાં સુધી પકાવવું. એ વાતનું ખાસ ધ્યાન રાખવું કે શાકભાજી વધારે બફાઈ ન જાય. શાકભાજી ચડી જવા જોઈએ પરંતુ ક્રન્ચી હોવા જોઈએ. હવે તેમાં લીંબુનો રસ અને ફ્રેશ ક્રીમ ઉમેરીને બરાબર હલાવીને એક મિનીટ માટે પકાવવું. ત્યારબાદ તેમાં લીલા ધાણા ઉમેરીને હલાવીને ગેસ બંધ કરી દેવો.

વેજ કોલ્હાપુરી ને પીરસવું.