સૌ પ્રથમ એક પેનમાં કોકોનટ પાવડર સિવાયના કોલ્હાપુરી મસાલા ના બધા મસાલા ઉમેરીને ધીમા તાપે સરસ સુંગંધ આવે ત્યાં સુધી શેકી લેવા. હવે તેમાં કોકોનટ પાવડર ઉમેરીને 1/2મિનિટ માટે ધીમા તાપે શેકી ને ગેસ બંધ કરી દેવો અને બધા મસાલાને એકદમ ઠંડા થવા દેવા. ત્યારબાદ મિક્સર જાર માં ઉમેરીને આ મસાલાને વાટીને બારીક પાઉડર બનાવી લેવો.

એક પેનમાં 2 ટેબલસ્પૂન તેલ ગરમ થાય એટલે તેમાં કેપ્સિકમ અને વટાણા સિવાયના શાકભાજી બટેટા, ફૂલેવાર, ફણસી અને ગાજર ઉમેરીને હાઇ ગેસ ની આંચ પર ૩ થી ૪ મિનીટ માટે સાંતળી લેવા. હવે તેમાં કેપ્સિકમ અને વટાણા ઉમેરીને એક મિનીટ માટે સાંતળી લેવું. સાંતળેલા શાકભાજીને અલગ રાખવા.

હવે એજ પેનમાં 2 ટેબલસ્પૂન તેલ ઉમેરીને તેમાં આદુ, લસણ અને કાંદા ઉમેરી ને કાંદા ગુલાબી રંગના થાય ત્યાં સુધી સાંતળવા. હવે તેમાં ટામેટાના ટુકડા, કાજુ, મગજતરી અને 1/2 કપ પાણી ઉમેરી બધું બરાબર મિક્સ કરી ટામેટા એકદમ પોચા થઇ જાય ત્યાં સુધી મીડીયમ તાપ પર પકાવવું. આ મિશ્રણને એકદમ ઠંડુ થવા દેવું.

હવે ડુંગળી અને ટામેટાં નાં મિશ્રણને અડધા કપ પાણી સાથે મિક્સરમાં ઉમેરીને મુલાયમ પેસ્ટમાં વાટી લેવું.

એક પેન માં તેલ અને બટર ઉમેરી ને તેમાં તજ, તમાલપત્ર અને એલચો ઉમેરવા. હવે તેમાં હળદર પાઉડર, તીખું લાલ મરચું પાઉડર, ધાણા જીરું પાઉડર,ગરમ મસાલો અને કાશ્મીરી લાલ મરચું પાવડર ઉમેરી ને મિક્સ કરી લો. ત્યારબાદ તેમાં તૈયાર કરેલી ડુંગળી ટામેટાની ગ્રેવી ઉમેરવી. બધું બરાબર મિક્સ કરી લઈને ગેસ ની મીડીયમ તાપ પર 5 મિનીટ માટે કૂક કરી લો.

હવે તેમાં તૈયાર કરેલો કોલ્હાપુરી મસાલો બધો જ ઉમેરીને બરાબર મિક્સ કરી લો. જરૂરિયાત પ્રમાણે મસાલાનું પ્રમાણ વધારે કે ઓછું રાખી શકાય. ગેસ ની મીડીયમ આંચ પર ત્રણ થી ચાર મિનિટ સુધી પકાવીને તેમાં સાંતળેલા શાકભાજી ઉમેરી દેવા ને મિક્સ કરી લો.

હવે તેમાં એક કપ પાણી ઉમેરીને ઢાંકીને શાકભાજી લગભગ ચડી જાય ત્યાં સુધી પકાવવું. એ વાતનું ખાસ ધ્યાન રાખવું કે શાકભાજી વધારે બફાઈ ન જાય. શાકભાજી ચડી જવા જોઈએ પરંતુ ક્રન્ચી હોવા જોઈએ. હવે આમાં પનીર ના ટુકડા અને નમક ઉમેરી મિક્સ કરી 1 મિનિટ માટે કૂક કરી લો. હવે તેમાં ફ્રેશ ક્રીમ ઉમેરીને બરાબર હલાવીને એક મિનીટ માટે કૂક કરી લો. ત્યારબાદ તેમાં લીલા ધાણા ઉમેરીને મિકસ કરી ગેસ બંધ કરી દેવો.

હવે આપણું એકદમ સ્વાદિષ્ટ ને ટેસ્ટી એવી વેજ કોલ્હાપુરી સબ્જી તૈયાર છે સર્વ કરવા માટે...આ સબ્જી ને લીલા ધાણાથી ગાર્નિશ કરો.