ફીલિંગ બનાવવા માટે એક કડાઈમાં ઘી ગરમ કરવું. હવે તેમાં રવો ઉમેરીને હલકા ગુલાબી રંગનો થાય ત્યાં સુધી શેકવો. હવે તેમાં કોપરાનું છીણ ઉમેરીને બધું બરાબર હલાવી લેવું.

હવે તેમાં કાજુ અને બદામ ઉમેરીને હલાવી લેવું. ગેસ બંધ કરીને એકદમ ઠંડું થવા દેવું. હવે તેમાં ઈલાયચી પાવડર, દ્રાક્ષ અને દળેલી ખાંડ ઉમેરીને બરાબર હલાવી લેવું. આ ફીલિંગ ને અઠવાડિયા અગાઉથી પણ બનાવીને રાખી શકાય છે. ફીલિંગ આગળ થી બનાવી રાખવાથી ઘૂઘરા બનાવવામાં ખૂબ જ સરળતા રહે છે.

એક વાસણમાં મેંદો અને ઘી ઉમેરીને આંગળી વડે બ્રેડ ક્રમ્સ જેવું થઈ જાય ત્યાં સુધી મિક્સ કરવું. હવે તેમાં થોડું-થોડું પાણી ઉમેરતા જઈ ને કઠણ લોટ બાંધી લેવો. લોટ ને ૨ થી ૩ મિનિટ માટે મસળીને ૩૦ મિનિટ માટે ઢાંકીને રહેવા દેવો.

30 મિનિટ પછી ફરી લોટ ને ૨ થી ૩ મિનિટ માટે મસળીને એમાંથી 50 નાના લુઆ કરી લેવા. હવે એક લુવાને લઈને એમાંથી પાતળી પૂરી વણીને કિનારીઓ પર પાણી લગાવી લેવું. એક બાજુ ફીલિંગ મૂકીને બીજી બાજુથી બંધ કરી લેવું અને કિનારીઓને હલકા હાથથી દબાવી દેવી. કિનારીઓ પર ચપટીથી કાંગરી બનાવવી અથવા તો કાંટાની મદદ થી સીલ કરી લેવું. બજારમાં તૈયાર મળતા ઘુઘરા ના મોલ્ડ નો પણ ઉપયોગ કરી શકાય.

એક કડાઈમાં મીડીયમ તાપ પર તેલ ગરમ કરી એમાં થોડા ઘુઘરા ઉમેરવા, વધારે ઘુઘરા ઉમેરવા નહીં. થોડા થોડા ઘુઘરા ધીમા તાપે હલકા ગુલાબી રંગના તળી લેવા. ધીમા તાપે તળવા થી ઘુઘરા એકદમ ક્રિસ્પી અને ફરસા બને છે. ઉતાવળે તળવાથી જોઈએ એવા બનતા નથી.

ઘુઘરાને દિવાળીની મીઠાઈઓ અને ફરસાણ સાથે સર્વ કરવા.