સૌ પ્રથમ પાલકના પાનને ચોખ્ખા પાણી થી ધોઈ તેની ડાંડીનો ભાગ હટાવી દેવાનો છે.

એક બાઉલમાં ચણાનો લોટ ઉમેરી તેમાં ધાણા જીરું પાઉડર, લાલ મરચું પાવડર, ગરમ મસાલો, હળદર પાઉડર, હિંગ અને સ્વાદ અનુસાર નમક, ખાંડ અને લીલા મરચાં આદુ લસણ ની પેસ્ટ ઉમેરવાનું છે.

ત્યારબાદ તેમાં કુકિંગ સોડા, લીંબુનો રસ અને તેલ ઉમેરવાના છે.

હવે તેમાં જરૂરિયાત મુજબ પાણી ઉમેરી બરાબર રીતે મિક્સ કરી મીડીયમ થીક બેટર તૈયાર કરવાનું છે.

તૈયાર કરેલા પાલકના પાન પર આ બેટરનું લેયર લગાવવાનું છે. તેના પર બીજુ પાલક નું પાન બેટર લગાવેલા પાન થી અડધા પાન પર મૂકી, આ જ રીતે બેટર સ્પ્રેડ કરવાનું છે. આ જ રીતે છ-સાત પાલકના પાન એકબીજા પર મુકતા જવાના છે અને બેટર લગાવતા જવાનું છે. હવે તેનો મીડીયમ ટાઈટ રોલ વાળી લેવાનો છે. રોલ પર અને તેના બંને છેડા પર પણ થોડું બેટર લગાવી છેડાને અંદર તરફ વાળી દેવાના છે.

હવે આ રોલને પાણી ગરમ કરેલા સ્ટીમરમાં પંદર થી વીસ મિનિટ માટે સ્ટીમ કરવા માટે મૂકવાના છે. ટુથપીક ભરાવી બરાબર રીતે સ્ટીમ થયા છે કે નહીં તે ચેક કરી લેવાનું છે. ત્યારબાદ આ રોલને સ્ટીમર માંથી બહાર કાઢી રૂમ ટેમ્પરેચર પર લાવવાના છે.

આ રોલને કટ કરી તેના ગોળ ટુકડા કરી લેવાના છે. જેથી પાલક પાત્રા તૈયાર થઈ જશે.

આ પાત્રાને વધારવા માટે એક કડાઈમાં તેલ ગરમ કરી તેમાં રાઇ, જીરુ, સફેદ તલ અને લીમડાના પાન ઉમેરી વઘાર તૈયાર કરવાનો છે.

તેમાં તૈયાર કરેલા પાત્રાના ટુકડાને ઉમેરવાના છે. વઘાર સાથે બરાબર રીતે મિક્સ કરી, મીડીયમ ફ્લેમ પર રાખી થોડા કડક થવા દેવાના છે.

હવે આપણા એકદમ સ્વાદિષ્ટ ને હેલ્થી એવા પાલક ના પાત્રા સર્વ કરવા માટે તૈયાર છે. આ પાત્ર ને ચા કે કોફી સાથે સવારના નાસ્તા માં ખાવાની મજા આવે છે.