हरभरा डाळ निवडून व स्वच्छ धुवून 4तास भिजवावी. प्रेशरकुकरमध्ये पाणी घालून डाळ शिजण्यास ठेवावी. शिजताना थोडीशी हळद घालावी.पुरणाला रंग छान येतो.कटाची आमटी किती करायची आहे,त्यानुसार डाळ शिजताना पाणी घालावे.म्हणजे शिजल्यावर निथळलेल्या पाण्याचा पुरेसा कट मिळतो.

कुकर 15मिनिटे मध्यम आचेवर ठेवावा.म्हणजे डाळ छान शिजते.मग 3-4शिट्ट्या करुन गँस बंद करावा. प्रेशर पडले म्हणजे शिजलेली डाळ पातेल्यावर चाळणी ठेवून उपसून ठेवावी.कट पूर्ण निथळू द्यावा.व बाजूला ठेवावा.

गँसवर कढई तापत ठेवून त्यात शिजलेली व निथळलेली डाळ व गूळ,साखर घालून पुरणास चटका देण्यास ठेवावे.सतत हलवत रहावे.कडेला चिकटत असलेले पुरण उलथण्याने सतत काढून एकजीव करावे.हळूहळू डाळ व गूळ,साखर एकजीव होऊ लागते.व घट्ट होऊ लागते.उलथणे घट्ट असे पुरणामध्ये उभे राहिले, पडले नाही की पुरण पूर्ण शिजले व चटका दिला गेला असे समजावे.खुटखुटीत असे पुरण शिजले पाहिजे.आता जायफळपूड व वेलचीपूड घालावी.गरम असतानाच पुरणयंत्रातून दळून काढावे.आपले पुरणपोळीसाठी लागणारे पुरण तयार आहे.

पुरणपोळीसाठी १ते२ तास अगोदर कणिक भिजवून ठेवावी लागते,म्हणजे कणिक भिजली की कणकेला तार चांगली येते.जितके पुरण सैल किंवा घट्ट असेल तशीच कणिकही असावी.तरच पोळी सुबक लाटता येते.
कणिक व मैदा चाळून घ्यावा.त्यात थोडे मीठ व तेल घालून कणिक भिजवावी.शेवटी त्यामध्ये तेल घालून खूप मळून घ्यावी व झाकून ठेवावी.

पोळी करताना कणिक सारखी करुन घ्यावी.लिंबाएवढी कणिक घेऊन त्याची खोलगट पारी तेल लावून बोटांनी करावी.जेवढा कणकेचा उंडा तेवढेच पुरण घ्यावे.पारीमध्ये पुरण घालून नीट उंडा बंद करावा.तवा एकीकडे मध्यम आचेवर तापत ठेवावा.
पोळपाटावर तांदळाची पीठी भुरभुरावी व त्यावर हा उंडा हलक्या हाताने थापून खूप हलक्या हाताने पुरणपोळी सगळ्या बाजूंनी एकसारखी लाटावी.तांदळाच्या पीठीने पोळी लाटताना भरभर सरकते.

लाटलेली पोळी अलगद तव्यावर टाकून खरपूस भाजून घ्यावी.टम्म फुगलेली पोळी हलकेच उलटावी.हवे असल्यास साजूक तूपही तव्यावरील पोळीवर घालून भाजावी.तयार पुरणपोळी कागदावर काढून ठेवावी.

स्वादिष्ट अशी ही पुरणपोळी भरपूर तूप घालून व बरोबर कटाची आमटी,बटाट्याची भाजी,भजी,पापड-कुरडई यासह सर्व्ह करावी.😋😋👍