ஒரு டம்ளர் இட்லி அரிசி,அரை டம்ளர் பச்சை அரிசி இரண்டையும், நன்றாக கழுவி 2 மணி நேரம் ஊறவைக்கவும். அரை டம்ளர் துவரம் பருப்பு, ஒரு ஸ்பூன் கடலைப்பருப்பு, ஒரு ஸ்பூன் பாசிப்பருப்பு, நான்கு வரமிளகாய் இவை அனைத்தையும் தனியாக ஊறவைக்கவும். ஒரு கைப்பிடி புதினா தலையை கழுவி வைத்துக் கொள்ளவும்.

முதலில் ஊறிய பருப்புகளுடன் துருவிய கேரட், பொடியாக அரிந்த தக்காளி, இஞ்சி, வர மிளகாய், மஞ்சள் தூள் பெருங்காயத்தூள், துருவிய தேங்காய்,u புதினா தலை தேவையான அளவு உப்பு இவை அனைத்தையும் ஒன்றாக சேர்த்துநைசாக அரைத்துக் கொள்ளவும்.

அரைத்த பருப்பு விழுதுடன் ஊறவைத்த அரிசியை சேர்த்து சிறிய ரவை பதத்தில் கொஞ்சம் கரகரப்பாக அரைத்துக் கொள்ளவும். உரித்த சிறிய வெங்காயத்தை ஒரு ஸ்பூன் சோம்பு டன் மிக்ஸி ஜாரில் ஒன்றிரண்டாக ஓட்டி அரைத்த மாவில் நன்றாக கலந்து கொள்ளவும். பொடியாக அரிந்த கருவேப்பிலை கொத்தமல்லி தழைகளை மாவில் சேர்த்து கலக்கவும். புதினா தோசை மாவு தயார்

இரண்டு மணிநேரம் கழித்து அரைத்த புதினா தோசை மாவை, தோசை ஊற்றும் பதத்தில் நீர் ஊற்றி கரைத்துக் கொள்ளவும். அடுப்பில் தோசைக்கல்லை வைத்து சூடேற்றி,கரைத்த மாவை மெலிதாக ஊற்றி, சுற்றி எண்ணெய் விடவும். இரண்டு நிமிடம் மூடி வைத்து சுடவும். பிறகு மூடியை எடுத்துவிட்டு மீண்டும் சிறிது நெய்யோ அல்லது எண்ணெயோ சேர்த்து தோசையை மொறுமொறுப்பாக சுட்டு எடுக்கவும் பொட்டுக்கடலை சட்னி, புளி சட்னி, வெண்ணெய், வெல்லம் இவற்றில் ஏதாவது புதினா தோசையுடன் தொட்டுக்கொண்டு சாப்பிடலாம். அவியல் மேலும் அடைதோசை சுவை சேர்க்கும்.