ஒரு கப் துவரம்பருப்பு ஒரு கப் கடலைப்பருப்பு இரண்டையும் நன்கு கழுவி இவற்றுடன் 4 வர மிளகாய் சேர்த்து சுமார் இரண்டு மணி நேரம் நன்கு ஊற வைத்துக் கொள்ளவும். 2 கப் பீட்ரூட் துருவி வைத்துக் கொள்ளவும். ஒரு பெரிய வெங்காயத்தை பொடியாக அரிந்து வைத்துக்கொள்ளவும். கருவேப்பிலை கொத்தமல்லி பொடியாக நறுக்கி கொள்ளவும். இஞ்சி விழுது ஒரு ஸ்பூன் தயார் செய்து கொள்ளவும்.நான்கு ஸ்பூன் அரிசி மாவை சலித்து வைத்துக் கொள்ளவும். நான்கு பச்சைமிளகாயை பொடியாக அரிந்து வைத்துக்கொள்ளவும்.

முதலில் இரண்டு மணி நேரம் ஊறிய பருப்பு வகைகளை, வரமிளகாய் உடன் சேர்த்து ஆட்டுக்கல்லு அல்லது கிரைண்டரில் கரகரப்பாக அரைத்துக் கொள்ளவும். அரைப்பதற்கு முன் ஒரு கைப்பிடி அளவு முழு பருப்பை தனியாக எடுத்து வைத்துக் கொள்ளவும். இவற்றுடன் துருவிய பீட்ரூட், பொடியாக அரிந்த வெங்காயம், கருவேப்பிலை கொத்தமல்லி, இஞ்சி விழுது, உப்பு, பெருங்காயத்தூள், அரிந்த பச்சை மிளகாய், தனியாக எடுத்து வைத்த முழு பருப்பையும் சேர்த்து நன்கு பிசைந்து கொள்ளவும்.

கலந்த வடை மாவில் நாலு ஸ்பூன் அரிசி மாவு சேர்த்து மீண்டும் கலந்து கொள்ளவும். வாணலியில் வடை பொரிப்பதற்கு தேவையான அளவு எண்ணெய் ஊற்றி நன்கு காய் வைத்துக் கொள்ளவும். மாவை உருண்டையாக உருட்டி உள்ளங்கையில் வைத்து தட்டி காய்ந்த எண்ணெயில் பொரித்து எடுக்கவும். இரண்டு மூன்று முறை சல்லி கரண்டியில் நன்கு திருப்பி விடவும் மிதமான தீயில் வேகவிட்டு கருகாமல் எண்ணெயை நன்கு வடித்துசிவக்க எடுக்கவும்.

இந்த பீட்ரூட் வடை, எண்ணெய் அதிகம் குடிக்காது. மாவை ரெடி செய்தவுடன் உடனே வடையை சுட்டு எடுக்கவும். சுவையான, மனமான, மொறுமொறுப்பான, வித்யாசமான, அனைவருக்கும் பிடித்தமான பீட்ரூட் வடை தயார். குழந்தைகளுக்கு வடையை சாஸுடன் கொடுக்கலாம்.