கேரட் ஆனியன் ரவா ரோஸ்ட் 🥕🌰/suji

முதலில் ஒரு கப் ரவை, ஒரு கப் அரிசி மாவு, அரை கப் மைதா மூன்றையும் சேர்த்து ஒரு வாணலியில் நன்கு சூடேறும் வரை வறுத்துக்கொள்ளவும். கொஞ்சம் சூடு ஆறியவுடன் மிக்ஸியில் இவற்றை நன்றாக இரண்டு நிமிடம் அரைத்துக் கொள்ளவும்.

மிக்ஸியில் அரைத்த உடன் மாவை உடனே தண்ணீர் ஊற்றி உப்பு சேர்த்து கரைத்துக் கொள்ளவும். ஏனென்றால் மாவு சூடாக இருக்கும் பொழுதே கரைத்து கொண்டால், மிக சுலபமாக கட்டிகள் இல்லாமல் கரைந்துவிடும். பிறகு ஒரு கேரட், ஒரு பெரிய வெங்காயம், ஒரு பச்சை மிளகாய் இவை மூன்றையும் பொடியாக அறிந்து கொள்ளவும். கேரட்டை மிகப் பொடியாக அறிந்து கொள்ளவும். கருவேப்பிலை கொத்தமல்லி இரண்டையும் பொடியாக அரிந்து வைத்துக்கொள்ளவும். மாவை குறைந்தது ஒரு மணி நேரமாவது ஊறவைக்கவும். ரவை ஊற ஊற கெட்டியாகி விடும்.

அதனால் காய்கறிகள் சேர்க்கும் பொழுது மீண்டும் தண்ணீர் சேர்த்து நீர்க்க கரைத்துக் கொள்ளவும்.ரவை ஊறியவுடன் பொடியாக அரிந்த கேரட், வெங்காயம், பச்சை மிளகாய், கருவேப்பிலை,கொத்தமல்லி,சீரகம் மிளகு இவை யாவற்றையும் சேர்த்து கலக்கி விடவும். வெங்காயம் அரிந்தவுடன் நன்றாக பிசைந்து கொள்ளவும். அப்பொழுது வெங்காயம் ஒன்றுடன் ஒன்று ஒட்டிக் கொள்ளாமல் தனித்தனியாக இருக்கும்.

தோசை ஊற்றும்போது ஒரு சிட்டிகை சமையல் சோடா சேர்க்கவும். பிறகு ஒரு ஸ்பூன் எண்ணெய் சேர்க்கவும். தோசைக்கல்லை அடுப்பில் வைத்து சூடு ஏறியவுடன் மாவை நடுவில் இருந்து ஊற்றாமல், தோசை கல்லின் ஓரத்திலிருந்து வட்டமாக பரவலாக கரண்டி கொஞ்சம் உயர்த்தி பிடித்து ஊற்றவும். இப்படி ஊற்றுவதால் தோசை மிகவும் மெலிதாக ஓட்டை ஓட்டையாக வரும். ஒவ்வொரு தோசை ஊற்றும் போதும் மாவை நன்றாக கலந்து கலந்து ஊற்றவும். இல்லையென்றால் ரவை அடியில் வெட்டியாக நின்றுவிடும்.

தோசை ஊற்றி எண்ணெய் விட்டவுடன் ஒரு மூடி போட்டு மூன்று நிமிடம் மிதமான தீயில் வேகவிடவும். ஒரு பக்கம் வெந்தவுடன் திருப்பிப் போடத் தேவையில்லை.

இப்போது சூடான சுவையான மொறுமொறுப்பான கேரட் ஆனியன் ரவா தோசை ரெடி. சட்னி-சாம்பார் அல்லது புளி சட்னி வகைகள் சேர்த்துக் கொண்டு சாப்பிடலாம்.