முதலில் காய்கறிகளை படத்தில் காட்டியவாறு நீளவாக்கில்அரிந்து கொள்ளவும். ஒரு வாணலியில் ஒன்றரை கப் தண்ணீர் சேர்த்து கொதிக்கவிடவும். முதலில் அரிந்த கேரட், கொத்தவரங்காய், முருங்கைக்காயை, வேறு நாட்டு காய்கறிகள் இருந்தால் அவைகளையும் போட்டு ஒரு ஐந்து நிமிடம் வரை வேக விடவும்.

காய்கள் பாதி வெந்தவுடன் அரிந்து வைத்த பூசணிக்காயை சேர்த்து மூடி வைத்து வேக விடவும். ஏனென்றால் எல்லா காய்களுடன் பூசணிக்காயை சேர்த்து வேக விட்டால் பூசணிக்காய் குழைந்து விடும். காய்களை குழைய வேக விட வேண்டாம். கடைசியாக காயில் தேவையான உப்பு சேர்க்கவும். முதலில் உப்பு சேர்த்தால் காய் கலர் மாற வாய்ப்புண்டு. பிறகு தேங்காய்,சீரகம், பச்சை மிளகாய் சேர்த்து மிக்ஸியில் தண்ணீர் ஊற்றாமல் பச்சையாக கொஞ்சம் கரகரப்பாக அரைத்துக் கொள்ளவும்.

வேகவைத்த காய்கறிகளில் தண்ணீர் சுண்டியவுடன் தேங்காய் விழுதை சேர்த்து கலந்து விடவும். மிதமான தீயில் கொஞ்சம் சூடுபடுத்தவும். தாளிக்கும் கரண்டியில் ஒரு ஸ்பூன் தேங்காய் எண்ணெய் விட்டு சூடானவுடன் அரை ஸ்பூன் கடுகு, அரை ஸ்பூன் உளுத்தம் பருப்பு, கருவேப்பிலை சேர்த்து தாளித்து காய்கறி களில் சேர்க்கவும். காய்களை மிதமான தீயில் சூடபடுத்தி விடவும். கடைசியாக கொத்தமல்லி தழை சேர்க்கவும்.

இப்போது கதம்ப கறி தயார். இந்த வகை கறி கேரளாவில் மிகவும் பிரசித்தம். மோர் குழம்பு மற்றும் நம் தமிழ்நாட்டு சாம்பார், ரசம் இவற்றுடன் சாதத்தில் சேர்த்து சாப்பிடவும் இந்த காய் கறி சுவையாக இருக்கும். மற்ற நாட்டுக் காய்கறிகள் வீட்டில் இருந்தால் சேர்த்து செய்யலாம். வாழைக்காய், அவரைக்காய் போன்ற காய்கள் சேர்த்து செய்தால் மிகவும் சுவை கூடும்.