சேமியா பால் பாயாசம்

அரை லிட்டர் ஆவின் பாலை தண்ணீர் சேர்க்காமல் காய்ச்சி வைத்துக் கொள்ளவும். ஏலக்காயை பொடி செய்து கொள்ளவும். அரை கப் சர்க்கரை எடுத்து வைத்துக் கொள்ளவும். 10 முந்திரிப்பருப்பை உடைத்து வைத்துக்கொள்ளவும். பத்து உலர் திராட்சை எடுத்து வைத்துக் கொள்ளவும். ஒரு கப் டரூ அல்லது சேவாரிட்சேமியா உடைத்து எடுத்து வைத்துக் கொள்ளவும்.

ஒரு நான் ஸ்டிக் கடாயில் 2 ஸ்பூன் நெய் சேர்த்து உருகிய உடன் முந்திரிப்பருப்பு மற்றும் திராட்சையை சிவக்க வறுத்து தனியாக எடுத்து வைத்துக் கொள்ளவும். பிறகு அதே நெய்யில் சேமியாவை சிவக்க வறுத்துக்கொள்ளவும். வறுத்த சேமியாவை யும் தனியாக எடுத்து வைத்துக் கொள்ளவும்.

இப்போது முன்பே காய்ச்சு வைத்த பாலை கடாயில் சேர்த்து சூடு படுத்தவும்.பால் காய்ந்தவுடன் வறுத்த சேமியாவை அதில் சேர்த்து 10 நிமிடம் வரை வேக விடவும். நன்கு வெந்தவுடன், அரை கப் சர்க்கரை அதில் சேர்த்து கரையும் வரை நன்றாக கரண்டி கொண்டு கலந்து விடவும். பின்பு பொடியாக்கி வைத்த ஏலக்காய்த்தூளை சேர்க்கவும்.

பாயாசத்தை வேறு பாத்திரத்திற்கு மாற்றி கொள்ளவும். இப்போது வறுத்து வைத்த திராட்சை மற்றும் முந்திரி பருப்பை அலங்கரிக்க கொஞ்சம் தனியாக எடுத்து வைத்துக் கொண்டு மீதியை பாயசத்தில் சேர்த்துக் கொள்ளவும். பரிமாறுவதற்கு தயாராக கிண்ணத்தை எடுத்து வைத்துக் கொள்ளவும். பாயசத்தை கப்பில் சேர்த்து மேலே வறுத்த முந்திரி மற்றும் திராட்சையை வைத்து அலங்கரித்து தரவும். சுவையான சேமியா பால் பாயாசம் தயார். விருந்திற்கு ஏற்ற பால் பாயாசம்.