நேந்திரம்பழ உன்னக்காய்

நேந்திரம் பழத்தை சரியான முறையில் தேர்ந்தெடுக்க வேண்டும். இது பச்சை காயாகவும் பழுத்த பழமாகவும் இருக்க கூடாது. தோல் மஞ்சளாக இருக்க வேண்டும் பழம் கெட்டியாக இருக்க வேண்டும். இதனை நான்கு துண்டுகளாக வெட்டி நடுவில் இருக்கும் விதைப் பகுதியை வெட்டி எடுக்கவும். பிறகு தோலை உரித்து எடுக்கவும்.

இதனை மிதமான தீயில் ஐந்து நிமிடங்கள் ஆவியில் வேக வைக்கவும். வெந்து பின் ஆறவிடவும்.

ஆறிய பின் கட்டிகள் இல்லாமல் நன்றாக மசித்து சப்பாத்தி மாவு போல உருட்டி கொள்ளவும்.

ஒரு கடாயில் 1 மேஜைக்கரண்டி நெய் சேர்த்து சூடானதும், நறுக்கிய முந்திரி, உலர் திராட்சை சேர்த்து லேசாக வறுத்து தேங்காய் துருவல் மற்றும் சர்க்கரை சேர்த்து குறைவான தீயில் வறுத்து கொள்ளவும். இறுதியில் ஏலக்காய் தூள் சேர்த்து அடுப்பை அணைக்கவும்.

நேந்திரம்பழ கலவையை எலுமிச்சை அளவு உருட்டிக் கொள்ளவும். இதனை குழி செய்து நடுவில் தேங்காய் பூரணத்தை வைத்து மடித்து ஓரங்களை கவனமாக அழுத்தம் கொடுத்து ஒட்டவும்.

இதனை கைகளால் அதிகம் அழுத்தம் கொடுக்காமல் இலவம்பஞ்சு காய் போல வடிவமைக்கவும். கடாயில் நெய் சேர்த்து சூடானதும் மிதமான தீயில் இவற்றை பொன்னிறமாக பொரித்து எடுக்கவும். நெய்க்கு பதிலாக எண்ணெயில் கூட பொரிக்கலாம்.