છોલે બનાવવા માટે, છોલેના ચણાને ધોઇને ૬ કલાક માટે પલાળી લેવા. પછી તેને મીઠું નાખી સામાન્ય ગળી જાય તેવા બાફી લેવા. ડુંગળી અને ટામેટા ને ઝીણા સમારી લેવા કે પીસી લેવા.હવે એક કઢાઇમાં ૨ ટેબલ ચમચી તેલ ગરમ મૂકી તેમાં જીરુ, લવિંગ, તજ, તમાલપત્ર, મોટી ઇલાયચી, બાદિયા અને હીંગનો વઘાર કરવો.

પછી વઘાર માં આદું લસણ મરચાં ની પેસ્ટ નાખી સાંતળવી. થોડું સંતળાય એટલે ક્રશ કરેલા ડુંગળી ટામેટા ઉમેરી સાંતળવા.બરાબર સંતળાય ને તેલ છૂટું પડે એટલે બધા સૂકા મસાલા (લાલ મરચું,હળદર,ધાણા જીરુ,છોલે મસાલો,ગરમ મસાલો,સંચળ પાઉડર,મીઠું) ઉમેરી મિક્સ કરી સાંતળવું.

હવે થોડા પાણી સાથે બાફેલા છોલે ચણા નાખી હલાવી ૧૦ મિનિટ ઢાંકીને થવા દેવા. વચ્ચે વચ્ચે હલાવતા રહેવું. થઇ જાય એટલે ફ્રેશ ક્રીમ,કસ્તૂરી મેથી અને કોથમીર નાખી મિક્સ કરી લેવું. ૨ મિનિટ કુક થવા દેવું.છોલે તૈયાર છે.

➡️ભટુરે બનાવવા માટે, એક મોટાં બાઉલમાં મેંદો ચાળીને લેવો. તેમાં મીઠું, ખાંડ, બેકિંગ સોડા, બેકિંગ પાઉડર, તેલ નાખી મસળીને મિક્સ કરવું. પછી તેમાં દહીં ઉમેરી ફરી બરાબર મિક્સ કરી લેવું.

હવે જરુર મુજબ પાણી ઉમેરી પરોઠા જેવો સોફ્ટ લોટ બાંધવો. ઉપર 1 ચમચી જેટલું તેલ લગાવી ઢાંકીને દોઢ થી બે કલાક માટે લોટ રાખવો. દહીં સોડાથી લોટમાં ખમીર આવશે. તેના માટે રેસ્ટ આપવો જરુરી છે. તે પછી લોટમાંથી મોટા ભાખરીના હોય તેવા લૂઆ બનાવી પાતળી પૂરી જેટલી જાડાઇવાળા ભટુરા વણવા. બાજુમાં તેલ ગરમ મૂકી દેવું. વણીને તરત ગરમ તેલમાં ભટુરાને મૂકવું. એની જાતે જ એ ફૂલશે. ગેસ મિડિયમ તાપે રાખવો. પૂરું ફૂલી જાય પછી ઉલ્ટાવીને બીજી બાજુ તળી લેવી. બન્ને બાજુ ગોલ્ડન બ્રાઉન તળાઇ જાય એટલે કાઢી લેવું.

ગરમ ભટુરાને ગરમાગરમ છોલે, તળેલા મરચા, આચાર, ડુંગળી સાથે સર્વ કરવા.