એક કઢાઈમાં લગભગ અડધો કપ પાણી ગરમ કરી તેમાં સમારેલી ડુંગળી, લસણ, કાજુના ટુકડા અને લીલા મરચાં ઉમેરીને ૫-૭ મિનિટ સુધી રાંધો. ત્યારબાદ મિશ્રણ થોડુ ઠંડુ થાય એટલે મિક્સરમાં પીસી પેસ્ટ બનાવી લો. ટમેટાં ને મિક્સરમાં પીસી પ્યુરી તૈયાર કરો.

હવે એક નોનસ્ટિક કડાઈમાં ૧ ચમચી જેટલું તેલ ગરમ કરી તેમાં સમારેલી મેથી ની ભાજી ને થોડીવાર સાંતળો. પછી તેને એક બાઉલમાં કાઢી લો. હવે તે જ કઢાઈમાં ઘી અને તેલ ગરમ કરો. હવે તેમાં તમાલપત્ર, લવિંગ, તજ, ઈલાયચી અને જીરું ઉમેરો.

જીરું તતડે એટલે તેમાં તૈયાર કરેલી ડુંગળી લસણ કાજુની પેસ્ટ ઉમેરીને ઘી છૂટું પડે ત્યાં સુધી સાંતળો. ત્યારબાદ તેમાં ટમેટા ની પ્યુરી ઉમેરીને સાંતળો.

ત્યારબાદ તેમાં ગરમ મસાલો, કાળા મરી નો પાઉડર અને હળદર ઉમેરીને મિક્સ કરો. હવે તેમાં દૂધ, મલાઈ ઉમેરો. બાફેલા અમેરીકન મકાઈના દાણા અને સાતળેલી મેથી ની ભાજી ઉમેરીને મિક્સ કરો.

હવે લચ્છા પરાઠા માટે ઘઉં ના લોટ માં મીઠું, કાળા તલ અને સમારેલી કોથમીર ઉમેરીને મિક્સ કરો. તેલ ઉમેરી મિક્સ કરો. પાણી થી નરમ કણક બાંધો. કણકને ઢાંકીને ૧૫-૨૦ મિનિટ સુધી રહેવા દો.

હવે કણક માં થી એક સરખા ગોળા વાળો. એક ગોળો લઈ અટામણ માં રગદોળી ગોળાકાર રોટલી વણી લો. તેની ઉપર ૧ ટી સ્પૂન જેટલું ઘી લગાવી થોડો અટામણ નો લોટ ભભરાવો. હવે તેને કાગળ ના પંખાની જેમ વાળી લો. ગોળાકાર માં વાળી છેડો પાછળ લગાવી લો.

હવે ફરીથી અટામણ માં રગદોળી વણી લો. ગરમ તવા પર બન્ને બાજુ તેલ મૂકી સોનેરી થાય તેવા શેકી લો. તૈયાર છે લચ્છા પરાઠા.