સૌ પ્રથમ એક મોટા બાઉલમાં ઘઉંનો લોટ, મીઠું, અજમો અને ઘી ઉમેરી બરાબર મિક્સ કરી લો. હવે પાણી થોડું થોડું ઉમેરતાં જઈ કડક લોટ બાંધી લો. હવે આ લોટ ને તેલ લગાવી ઢાંકી ને 20 મિનિટ માટે રેસ્ટ આપો.

હવે 20 મિનિટ બાદ લોટ ને ફરીથી કુણવી લઈ તેના નાના લુવા બનાવી લો. આ લુવા ને ઢાંકી ને મૂકી રાખો.

હવે મગ ની મોગર દાળ ને સારી રીતે ધોઈ લો અને તેને 4 થી 5 કલાક પલાળી રાખી ને તેમાંથી વધારાનું પાણી નિતારી ને તેને કરકરી પીસી લો.

હવે આપણે કચોરી નું સ્ટફિંગ બનાવીશું. તેની માટે એક પેન માં તેલ ગરમ કરી તેમાં બેસન ઉમેરી બરાબર મિક્સ કરી સાંતળી લો. હવે આમાં વરિયાળી, સૂકા ધાણા, કાળા મરી, લાલ મરચું પાઉડર, હળદર પાઉડર, ધાણા પાઉડર, ગરમ મસાલો અને કસુરી મેથી ઉમેરી બરાબર મિક્સ કરી લો.

ત્યાર બાદ આમાં મગ ની દાળ, હિંગવાડું પાણી, આમચૂર પાઉડર અને સંચળ પાઉડર ઉમેરી બરાબર મિક્સ કરી ગેસ ની આંચ બંધ કરી ઠંડું કરી લો. ત્યાર બાદ આ મિશ્રણમાંથી નાના નાના બોલ્સ બનાવી લો.

હવે ઘઉં ના લોટ ના કણક ના લુવા ની નાની ઠેપ્લી બનાવી તેમાં મગ ની દાળ નો બોલ ઉમેરી કચોરી નો સેપ આપી દો.

હવે આપણે તરી વાળા બટાકા નું શાક બનાવિશું. એક પેન મા તેલ ગરમ કરી તેમાં જીરું ઉમેરી, જીરું કકડે એટલે એમાં સૂકા ધાણા, કાળા મરી, સૂકા લાલ મરચા હિંગ વાળું પાણી, લાલ મરચું પાઉડર, ધાણા પાઉડર અને ઝીણા સમારેલા ટામેટા ઉમેરી બરાબર મિક્સ કરી 5 થી 7 મિનિટ માટે કૂક કરી લો.

હવે આમાં બોઇલ બટાકા ને મેશ કરી તેમાં ઉમેરી બરાબર મિક્સ કરી લો. હવે આમાં પાણી, મીઠું, ગરમ મસાલો, કસુરી મેથી અને લાલ મરચું પાઉડર ઉમેરી 5 થી 7 મિનિટ માટે ધીમા ગેસ ની આંચ પર કૂક કરી લો. ઉપરથી લીલી કોથમીર ના પાન ભભરાવી ગાર્નિશ કરી લો. જેથી તરીવાળા બટાકાની ગ્રેવી તૈયાર થઈ જાય.

હવે એક પેન મા તેલ ગરમ કરી તેમાં 3 કે 4 કચોરી ઉમેરી સ્લો ગેસ ની આંચ પર 10 થી 12 મિનિટ સુધી સોનેરી રંગની થાય ત્યાં સુધી તળી લો.

હવે એક બાઉલ મા કચોરી ના કટકા કરી તેની પર બનાવેલી બટાકા ની ગ્રેવી, આંબલી ની ચટણી, લીલી કોથમીર ના પાન, ઝીણા સમારેલા લીલાં મરચાં અને આદુ ની જુલિયન ઉમેરી ગાર્નિશ કરી લો.

હવે આપણી એકદમ ખસ્તા દિલ્હીવાલી કચોરી તૈયાર છે સર્વ કરવા માટે. આ કચોરી ને બટાકા ની ગ્રેવી સાથે ખાવાની ખુબ જ મજા આવે છે.