સૌ પ્રથમ સીંગતેલ ને ધુમાડો નીકળે એટલું ગરમ કરી ને ઠંડું કરવા બાજુ પર મૂકી દો. ત્યાર બાદ ગુંદા ને ધોઈને કોરા કરી તેમાંથી ખલ ના દસ્તા થી મારી ને છરી ને મીઠું વાળી કરી ઠડીયો કાઢી લઈ પછી ગુંદાની અંદર થી પણ આંગળી ને મીઠું વાળી કરી બધી ચિકાસ કાઢી લો.

હવે રાજાપુરી કાચી કેરી ને ધોઈ ને સાફ કરી તેની છાલ ઉતારી મોટી છીણી થી છીણી લો. તે પછી આ કેરી ના છીણ માં મીઠું અને હળદર પાઉડર ઉમેરી મિક્સ કરી તેને ઢાંકણ ઢાંકી ને 10 મિનિટ માટે બાજુ પર મૂકી રાખો.

હવે 10 મિનિટ પછી કેરી ના છીણ માંથી છૂટેલું બધું પાણી હાથ થી દબાવી ને નિતારી લો. ને છીણ ને કોરું કરી લો. (છીણ નું નીતરેલું પાણી ને ફેંકવાનું નથી તેને બીજા અથાણાં બનાવવા માટે આથવા માટે સ્ટોર કરવાનું છે)

હવે આ કેરી ના છીણ માં અથાણાં નો ખાટો આચાર મસાલો ઉમેરી મિક્સ કરી આ મસાલો બધા ગુંદા માં દબાવીને ભરી લો. ને વધેલો મસાલો ગુંદા પર ઉમેરી દબાવી લો ને 5 થી 7 કલાક કે આખી રાત માટે ઢાંકી ને બાજુ પર મૂકી રાખો.

હવે આ ગુંદા ના અથાણાં ને કાચ ની બરણી માં દબાવી ને ભરી લો. ત્યાર બાદ આમાં ગરમ કરેલું ને ઠંડુ કરેલ સીંગતેલ ધીરે ધીરે ઉમેરી ચમચી થી મસાલા ને દબાવતા જઈ તેલ રેડતા જવું. તેલ અથાણું ડૂબે એટલે સુધી ઉમેરવાનું છે..હજી જરૂર પડે તો તેલ ગરમ કરી ઠંડુ કરી ને ઉમેરી સકાય છે.

હવે આપણું ગુંદા નું ખાટું અથાણું તૈયાર છે...આ અથાણાં ને બનાવ્યા પછી 5 થી 6 દિવસ પછી ખાવાના ઉપયોગ માં લેવું..આ ગુંદા નું ખાટું અથાણું રોટી, પરાઠા કે ખીચડી સાથે ખાવાની મજા આવે છે.