સૌપ્રથમ બેસનને એક ચારણીથી ચાળી લેવું. હવે એક નાના વાડકામાં મીઠું, બેકિંગ સોડા અને હિંગ ઉમેરી એમાં પાણી ઉમેરીને બરાબર મિક્ષ કરી લેવું.

હવે લોટ ની વચ્ચે ખાડો કરીને એમાં તૈયાર કરેલું પાણી ઉમેરી દેવું તેમાં તેલ ઉમેરીને બધું બરાબર મિક્સ કરી લેવું. હવે તેમાં અજમા અને અધકચરા વાટેલા કાળા મરી ઉમેરીને બરાબર હલાવી લેવું. હવે તેમાં એકવારમાં 1 ટેબલસ્પૂન પાણી ઉમેરતા જઈ ને મિક્સ કરતા જવું અને ઢીલો લોટ બાંધી લેવો. પાણી વધારે પડી ના જાય એ વાતનું ખાસ ધ્યાન રાખવું.

હવે લોટની ઉપર ૧ ટીસ્પૂન તેલ ઉમેરીને લોટ ને મુલાયમ થાય ત્યાં સુધી મસળવો. હવે લોટમાંથી 32 એકસરખા લંબગોળાકાર લુઆ બનાવી લેવા. લુવાને ઢાંકી દેવા અને બધા ફાફડા બની જાય ત્યાં સુધી ઢાંકેલા રાખવા નહીંતર સૂકા થઈ જાય છે.

હવે લાકડાના બોર્ડ પર એક લુઆ ને લઈને હથેળી નાં નીચેના ભાગ ની મદદથી ઉપરની તરફ ખેંચવું. આ રીતે પાંચ થી છ ઇંચનો એક ફાફડો તૈયાર થશે. હવે એક ધારદાર પટ્ટી ચપ્પુની મદદથી ઉપરથી નીચેની તરફ એકવારમાં ફાફડા ને ઉખાડી લેવો. ધીરે કરવાથી ફાફડા ના ટુકડા થઈ જશે. ચપ્પુ ને સીધું રાખીને ઉખાડવાથી આસાનીથી ફાફડા લાકડાના બોર્ડ પર થી ઉખડી જાય છે. દરેક ફાફડા ઘસતી વખતે હથેળીને સાફ કરી લેવી.

એક પેનમાં મીડીયમ તાપ પર તેલ ગરમ કરવું. તળવા માટે મોટું વાસણ પસંદ કરવું જેથી કરીને આખા ફાફડા આસાનીથી તળી શકાય. ફાફડા અને મીડીયમ થી ધીમા તાપે તળી લેવા. ફાફડા ને તળતા લગભગ એક બાજુ બે થી ત્રણ મિનિટ લાગે છે. ફાફડા ઘસતા જવા અને તળતા જવા આ રીતે બધા ફાફડા તૈયાર કરી લેવા.

કઢી બનાવવા માટે એક વાસણમાં બેસન અને દહીં મિક્ષ કરી લેવું. હવે તેમાં પાણી ઉમેરીને બરાબર હલાવી લેવું જેથી કરીને એકરસ મિશ્રણ બની જાય.

એક વાસણમાં તેલ ગરમ થાય એટલે તેમાં રાઈ ઉમેરવી. રાઈ ફૂટે એટલે તેમાં હિંગ અને લીલા મરચાં નાં ટુકડા ઉમેરીને દહીં અને બેસન નું મિશ્રણ ઉમેરી દેવું. હવે તેમાં મીઠું, ખાંડ અને હળદર ઉમેરીને બરાબર હલાવી લેવું. વચ્ચે-વચ્ચે હલાવતા રહેવું અને મીડીયમ તાપ પર જ્યાં સુધી કઢી જાડી થઈ જાય ત્યાં સુધી પકાવવી.

પપૈયા નો સંભારો બનાવવા માટે પપૈયાને ધોઈને છોલીને છીણી લેવું. હવે એક પેનમાં તેલ ગરમ થાય એટલે તેમાં રાઈ ઉમેરવી. રાઈ ફૂટે એટલે તેમાં હિંગ અને લીલા મરચા ઉમેરવા. થોડીવાર સાંતળીને તેમાં પપૈયાની છીણ, હળદર અને મીઠું ઉમેરવું. બધુ બરાબર હલાવી લેવું.

ત્રણ થી ચાર મિનિટ માટે મિડિયમ તાપ પર પકાવીને ગેસ બંધ કરી દેવો.