સૌ પ્રથમ બધા કઠોળને ધોઈ આખી રાત પાણીમાં પલાળીને રાખો. ત્યારબાદ તેનું પાણી નિતારી કોટનનાં કપડામાં બાંધીને ફણગાવી લો. પછી કૂકરમાં ફણગાવેલા કઠોળ, મીઠું, હળદર અને ૨ ગ્લાસ પાણી ઉમેરીને ૧ સીટી વગાડી લો.

કડાઈમાં આખા ધાણા, મરી, વરિયાળી, તજ, લવિંગ અને સૂકા લાલ મરચાને ધીમા તાપે ૪ થી ૫ મીનીટ શેકી લો. ત્યારબાદ તેમાં ટોપરાનું છીણ ઉમેરી ૨ મિનીટ શેકી બધા જ મસાલા થાળીમાં કાઢીને ઠંડા કરી લો. પછી મિક્સર જારમાં લઈને બારીક પીસી લો.

કડાઈમાં તેલ ગરમ કરી તેમાં રાઈ, જીરું, હિંગ, આદુ, લસણ, મરચાની પેસ્ટ ઉમેરી સાંતળો. પછી મીઠો લીમડો અને ડુંગળી નાખી ૩ મિનીટ માટે સાંતળો. હવે, ટામેટાં ઉમેરી મિક્સ કરી લો. ટામેટા નરમ થાય પછી તેમાં હિંગ, હળદર, ધાણાજીરૂ, લાલ મરચું, ગરમ મસાલો અને મિસળ મસાલો ઉમેરી મિક્સ કરી લો.

મસાલામાંથી તેલ છૂટું પડે પછી તેમાં બાફેલા કઠોળ, ૧ ગ્લાસ ગરમ પાણી અને ગોળ ઉમેરીને ૧૦ મિનીટ ધીમા તાપે ઉકાળી લો. તો હવે તૈયાર મિસળને સર્વિંગ ડીશમાં લઈ તેની ઉપર ચવાણું, કોથમીર અને ડુંગળી નાખી પાઉં સાથે ગરમ ગરમ પીરસો.