મસાલા માટે બધી વસ્તુઓને ભેગી કરી લેવી. હવે ચણાની દાળ અને અડદની દાળને ધીમા તાપે શેકી એક વાસણમાં કાઢી લેવી. પેનમાં આખા ધાણા, જીરું, મેથી, તજ, લવિંગ, મરી, ઇલાયચી, જાવિત્રી ઉમેરીને ધીમા તાપે શેકી લેવું. હવે કરી પત્તા અને ત્યારબાદ મરચાં અલગ અલગ શેકી લેવા. હવે ખસખસ અને કોપરુ શેકી લેવું અને ગેસ બંધ કરી દેવો. તેમાં હિંગ ઉમેરી બધી વસ્તુઓ સાથે ભેગું કરી દેવું. ઠંડી થયેલી વસ્તુઓમાં કાશ્મીરી મરચુ ઉમેરીને બધી વસ્તુઓ નો પાવડર બનાવી લેવો. જરૂરિયાત પૂરતો મસાલો વાપરીને બાકીનો મસાલો ફ્રિજમાં સ્ટોર કરી શકાય છે.

દાળ અને ચોખાને અલગ અલગ ધોઈ લેવા. હવે ચોખામાં સિંગ દાણા ઉમેરીને તેમાં 2 કપ પાણી અને મીઠું ઉમેરવું. દાળ માં હળદર અને એક કપ પાણી ઉમેરવું. હવે બંને વસ્તુઓને કૂકરમાં બાફી લેવી. મેં બંને વસ્તુઓને સાથે બાફી છે પરંતુ અલગ અલગ પણ બાફી શકાય. બાફેલી દાળને ચમચાની મદદથી બરાબર હલાવી એકરસ કરી લેવી.

એક વાસણમાં એક કપ પાણી ઉમેરી તેમાં આમલીનો પલ્પ, ગોળ, બીસી બેલે ભાત મસાલો અને મીઠું ઉમેરીને બધું બરાબર હલાવી લેવું. બધા શાકભાજી કાપીને તૈયાર કરવા.

એક પેનમાં ઘી ગરમ થાય એટલે તેમાં કાંદા ઉમેરીને એક મિનીટ માટે મિડિયમ તાપ પર સાંતળવા. હવે તેમાં બીજા બધા શાકભાજી ઉમેરીને મીડીયમ તાપ પર પકાવવું. શાકભાજી લગભગ ચડી જવા આવે ત્યારે તેમાં મસાલા વાળું પાણી ઉમેરીને બધું બરાબર હલાવી લેવું. ઢાંકીને શાકભાજી પકાવી લેવા. શાકભાજી ચડી જાય પરંતુ ક્રન્ચી રહે એ વાતનું ખાસ ધ્યાન રાખવું.

હવે તેમાં દાળ અને ભાત ઉમેરી દેવા. બધું બરાબર હલાવી લઈને તેમાં 2 કપ પાણી ઉમેરી ધીમા તાપે 15 મિનીટ માટે પકાવવું. વચ્ચે વચ્ચે હલાવતા રહેવું. જરૂરિયાત મુજબ પાણી ઉમેરવું કારણ કે ઠંડા પડ્યા પછી ભાત થોડા સખત બની જાય છે જેથી પહેલેથી જ થોડા ઢીલા રાખવા.

વઘાર માટે ઘી ગરમ થાય એટલે તેમાં રાઈ ઉમેરવી. રાઈ ફૂટે એટલે તેમાં કાજુ ઉમેરવા કાજુ હલકા ગુલાબી થાય એટલે તેમાં હિંગ, કરી પત્તા અને આખું મરચું ઉમેરી ને આ વઘારને તૈયાર થયેલા બીસી બેલે ભાત ઉપર રેડી બરાબર હલાવી લેવું.