એક જાડા તળિયા ના વાસણ માં દૂધ ગરમ મુકો અને ઉભરો આવે એટલે આંચ બંધ કરો. ત્યારબાદ ધીમે ધીમે લીંબુ નો રસ નાખતા જાઓ અને હલાવતા રહો. દૂધ સારી રીતે ફાટી જાય અને પનીર જળ છૂટું પડે ત્યાં સુધી હલાવો.

હવે ચારણી માં મલમલ નું કપડું રાખી તેમાં આ મિશ્રણ નાખો જેથી પનીર અને પનીર જળ અલગ થઈ જાય. આ પનીર ને કપડાં સાથે નળ નીચે પાણી થી ધોઈ લો અને થોડું દબાવી પાણી કાઢી લો અને પછી થોડી વાર ઉપર વજન મૂકી દો જેથી બધું પાણી નીકળી જાય.

મલાઈ ચોપ માટે છેનો બહુ સૂકો નહીં અને બહુ પાણી વાળો પણ નહીં એવો જોઇશે માટે એ પ્રમાણે નિતરવા દેવો. પછી એક મોટી પ્લેટ કે પરાત માં છનો કાઢી લો અને તેમાં મેંદો ઉમેરી ને નરમ થાય ત્યાં સુધી મસળો. હાથ માં થોડી ચીકાશ લાગે ત્યાં સુધી જ મસળવું. પછી તેમાં થી થોડો છેનો લઈ ને મસળી ને, લીસો અને ચપટો, ગોળ અથવા ચોરસ આકાર આપો.

હવે ખાંડ માં પાણી નાખી આંચ ચાલુ કરો અને ખાંડ ઓગળે ત્યાં સુધી ચમચા થી હલાવતા રહેવું. ઉકળવા નું ચાલુ થાય એટલે સાચવી ને તૈયાર કરેલા ચોપ્સ તેમાં નાખો. ઢાંકણ ઢાંકી ને 5-8 મિનિટ ચડવા દો. ધ્યાન રહે કે ચોપ્સ ચડી ને સાઈઝ માં બમણા થશે તેથી વાસણ પહોળું અને મોટું લેવું અને બહુ બધા ચોપ્સ સાથે ના નાખવા. 5-8-મિનિટ પછી ઢાંકણ ખોલી ને સાચવી ને બધા ચોપ્સ ને પલટાવી દો અને ફરી ઢાંકણ ઢાંકી 15 મિનિટ ચડવા દો. પછી ખોલી ને ચેક કરવું. સરખા ફૂલી ને ચડી જાય એટલે આંચ બંધ કરી, ઠંડા થાય ત્યાં સુધી ઢાંકી ને રાખવા.

ચોપ્સ ઠંડા થાય એટલે તેને ચાસણી માંથી કાઢી થોડી વાર ચારણી માં રાખો જેથી વધારા ની ચાસણી નીતરી જાય. પછી વચ્ચે થી કાપો. અને તૈયાર કરેલું મિશ્રણ લગાવી ફરી બંધ કરી દો.

ફ્રીઝ માં ઠંડા થવા રાખો. ઠંડા ઠંડા ન્યુટેલા મલાઈ ચોપ્સ નો આનંદ ઉઠાવો.