સૌ પ્રથમ રીંગણ, ટમેટું, કાંદા અને લસણ ની કડી પર તેલ લગાડી શેકવું. શાક ગેસ પર ફેરવતા જવું અને શેકતા જવું. લસણ શેકાતા ૧ મિનીટ લાગશે, ટમેટું શેકાતા ૨-૩ મિનીટ લાગશે, કાંદા શેકાતા ૧૦-૧૨ મિનીટ લાગશે અને રીંગણ શેકાતા ૨૫-૩૦ મિનીટ લાગશે. શાક ઠંડુ પડે એટલે છાલ ઉતારી લેવી. કાંદા, ટામેટા, આદું અને લસણ ને મિક્ષર માં અધકચરુ વાટી લેવું અને રીંગણ ને હાથ થી મસળી લેવું.

મેં ભડથું માટી ની હાંડી માં બનાવ્યું છે, તમે નોન સ્ટીક કઢાઈ માં બનાવી શકો. એક કઢાઈ માં ૩ ટેબલસ્પુન તેલ ગરમ કરી રાઈ અને જીરું તતડે એટલે હિંગ અને લીમડો ઉમેરવો. હવે અધકચરા વાટેલા કાંદા, ટામેટા, આદું અને લસણ ની પેસ્ટ ઉમેરી મીડીયમ તાપે શેકવું.

૫-૧૦ મિનીટ શેકાયા પછી તેલ છુટું પડશે એટલે લીલા મરચાં ની પેસ્ટ, લાલ મરચું પાવડર, હળદર, મીઠું, ધાણાજીરું પાવડર અને ગરમ મસાલો ઉમેરી ૩-૪ મિનીટ શેકવું. ત્યારબાદ રીંગણ નો ઓળો ઉમેરી એક રસ મિક્ષ કરવું. ૫-૭ મિનીટ પછી ગેસ બંધ કરી દેવું.

રીંગણ ના ઓળા માં કોબીજ નું પાન મૂકી, એકદમ ગરમ કોલસો મૂકી એના પર ઘી રેડી તરતજ ઢાકાણ ઢાંકીદો. ૫-૭ મિનીટ ઢાકાણ ઢાંકી રાખો. કોથમીર અને લીલા કાંદા ભભરાવી બાજરી અથવા જુવાર ના રોટલા અને સફેદ માખણ સાથે સર્વ કરો.