पद्धत १ :-
१) मूंग डाळ आणि तूर डाळ एकत्र ५-६ तास भिजत घालावी. मूंग डाळ आणि तूर डाळ भिजली कि थोडावेळ ती निथळत ठेवावी. त्यातील पाणी निघून गेले कि त्यात आले लसूण पेस्ट, मिरचीपेस्ट, हिंग, हळद, जिरे, मीठ, कोथिंबीर घालून मिक्सरमध्ये बारीक करून घ्यावे. मिक्सरमध्ये मिश्रण वाटताना पाणी घालू नये नाहीतर गोळे एकसंध राहणार नाहीत. या मिश्रणाचे एक इंचाचे घट्टा गोळे करून घ्यावे. आवश्यक तेवढा जोर देऊन गोळे घट्ट करावेत जेणेकरून ते कढीत फुटणार नाहीत.

२)दह्याचे पातळसर ताक करून घ्यावे. त्यात चणापिठ गुठळी न राहता मिक्स करावे. पातेल्यात तूप किंवा तेल गरम करावे. त्यात मोहोरी, जिरे, हिंग, हळद, कढीपत्ता, मेथी दाना घालून फोडणी करावी. मिरच्यांचे तुकडे घालावे. जर लसूण आवडत असेल तर ५ लसूण पाकळ्या ठेचून घालाव्यात. त्यात ताक घालावे. आणि मध्यम आचेवर उकळी येईस्तोवर ढवळत राहावे. चवीपुरते मिठ घाला.

३) कढीला उकळी आली कि आधी एक गोळा कढीत घालून बघावा जर तो फुटला नाही तर एक एक करून हळू हळू गोळे आत सोडावेत. शेवटचा गोळा घातल्यानंतर ५ मिनीटे कढीत शिजू द्यावेत. गरम गरम खायला घ्यावेत.

विदर्भात काही ठिकाणी कढीत भजी टाकण्याचीही पध्दत आहे, मात्र कढी उकळताना त्यात भजी टाकण्याऐवजी ती ताटात कढी वाढल्यावर गरमागरम भजी करुन कढीच्या वाटीत सोडली जातात. यामुळे कढीची चव मिळतेच, पण भज्यांचा कुरकुरीत पणाही कायम राहातो.हे गोळे किंवा पकोडे भातासोबत, पोळी किंवा भाकरीसोबत फारच छान लागतात.

पद्धत २:-
कृती : भिजलेली डाळ मिक्सरवर जाडसर वाटावी. त्यामध्ये वाटतानाच आले, लसूण, मिरची, मीठ, जिरे घालावे. आपल्या चवीनुसार वरून हळद घालावी. वाटलेल्या डाळीचे छोटे छोटे गोळे वळावेत. तयार गोळे चाळणीला तेल लावून अथवा कुकरच्या डब्याला तेल लावून त्यात ठेवून वाफवावे अथवा प्रेशरकुक करावेत. जेवणापूर्वी गोळे कढीत सोडावे व गरम करावे. वरून चिरून कोथिंबिरीने सजवावे.

टीप:
कढी बनवताना थोडी जास्त बनवावी कारण गोळे घातल्यावर गोळे कढी शोषून घेतात. गोळे जर बनत नसतील तर त्यात बेसन घालावे.