குடமிளகாய் சாதம்😋

முதலில் ஒரு கப் பாஸ்மதி அரிசியை அல்லது சீரகசம்பா அரிசியை கழுவி 15 நிமிடம் ஊற வைத்துக் கொள்ளவும். ஒரு பெரிய வெங்காயத்தை நீளவாக்கில் சன்னமாக அறிந்துகொள்ளவும். அதேபோல் குடை மிளகாயையும் நீளமாக சங்கமாக அறிந்து கொள்ளவும். 15 நிமிடம் ஊறிய அரிசியை சாதமாக வடித்துக் கொள்ளவும்

ஒரு வாணலியில் இரண்டு ஸ்பூன் வேர்கடலை, ஒரு ஸ்பூன் வரக்கொத்தமல்லி, அரை ஸ்பூன் கடலைப்பருப்பு, அரை ஸ்பூன் உளுத்தம் பருப்பு, அரை ஸ்பூன் சீரகம் ஒரு ஸ்பூன் எள்ளு, 4 வரமிளகாய் எண்ணெய் சேர்க்காமல் நன்கு வாசம் வரும் வரை சிவக்க வறுத்துக்கொள்ளவும். இவற்றை நன்கு ஆற விடவும்.ஆறிய பிறகு மிக்ஸியில் கரகரப்பாக அரைத்துக் கொள்ளவும்.

மீண்டும் கடாயில் இரண்டு ஸ்பூன் எண்ணெய் அல்லது நெய் சேர்த்து, காய்ந்தவுடன் அரை ஸ்பூன் கடுகு சேர்த்து பொரிய விட்ட பிறகு கருவேப்பிலை சேர்க்கவும்.அதன் பிறகு நீளவாக்கில் அரிந்த ஒரு பெரிய வெங்காயத்தை நன்கு சிவக்க வறுத்து கொள்ளவும். அதன் பிறகு நீளவாக்கில் அரிந்த குடமிளகாயை அதில் சேர்த்து வதக்கவும். ஒரு நிமிடத்தில் குடமிளகாய் தோல் லேசாக சுருங்க தொடங்கும்.

அப்போது அரை ஸ்பூன் மஞ்சள் தூள், அரை ஸ்பூன் கரம் மசாலாத்தூள் சேர்க்கவும். தேவையான அளவு உப்பு சேர்த்து அதனுடன் கரகரப்பாக அரைத்து வைத்த பொடியை சேர்த்து நன்கு வாசம் வரும் வரை வறுக்கவும். இவற்றுடன் உதிரியாக வடித்த சாதத்தை உடையாமல் கிளறிவிட்டு ஐந்து நிமிடம் மூடி போட்டு மூடவும். 5 நிமிடம் கழித்து அறிந்து வைத்த கொத்தமல்லித்தழையை சேர்த்து சாதத்தை நன்கு கலக்கவும்.

சூடான, சுவையான, சத்தான, குடமிளகாய் சாதம் தயார். தொட்டுக்கொள்ள அப்பளம், வடகம் ஏதாவது ஒன்றை தயார் செய்து கொள்ளவும். இப்படி செய்து கொடுத்தால் குழந்தைகளும் விரும்பி சாப்பிடுவர். பள்ளி அலுவலகத்திற்கு ஏற்ற லஞ்ச் பாக்ஸ்.