தேவையான பொருட்கள் அனைத்தையும் தயாராக எடுத்து வைக்கவும் நான் படத்தில் காட்டியுள்ள அந்த சின்ன கப்பில் அளந்துள்ளேன்

சர்க்கரை உடன் தண்ணீர் சேர்த்து இரண்டு நிமிடம் வரை கலந்து கொண்டு பின் அடுப்பை பற்ற வைத்து மிதமான தீயில் வைத்து கொதிக்க விடவும், சர்க்கரை கரைந்ததும் மெல்லிய தீயில் வைத்து பாகு பதம் வரும் வரை கிளறிவிடவும்

ஒரு கம்பி பதத்திற்கு ஒரு நிமிடம் முன்பு கடலைமாவை சிறிது சிறிதாக தூவி நன்கு கிளறவும் (கம்பி பதம் வர வேண்டியதில்லை கைகளில் தொட்டு பார்த்தால் கம்பி வந்ததுமே உடையும் அதுவே பதம்)

சர்க்கரை பாகில் கடலைமாவு நன்கு கட்டியில்லாமல் கலந்து வெந்து திக்காக வரும் வரை கிளறிவிடவும் (அடுப்பை மெல்லிய தீயில் வைத்தே செய்ய வேண்டும்) இதற்கிடையில் பக்கத்து அடுப்பில் எண்ணெய் மற்றும் வனஸ்பதி ஐ ஒன்றாக சேர்த்து சூடாக்கவும்

பின் சூடான எண்ணெயை சிறிது சிறிதாக கரண்டியால் எடுத்து ஊற்றி நன்கு கிளறவும் தொடர்ந்து ஊற்ற கூடாது ஒருமுறை ஊற்றியதை மாவு நன்கு உள் இழுத்ததும் அடுத்த கரண்டி எண்ணெயை ஊற்ற வேண்டும் இப்படியே சூடான எண்ணெய் வனஸ்பதி கலவை முழுவதையுமே ஊற்ற வேண்டும் (தவறாமல் ஒவ்வொரு முறையும் உள் இழுத்த பின் ஊற்றவும்)

கடலைமாவு நன்கு வெளுத்து நிறம் மாறி வரும், வெந்ததும் நன்கு கிளற கிளற மணம் வர ஆரம்பிக்கும்,கைவிடாமல் தொடர்ந்து மெல்லிய தீயில் வைத்து கிளறவும் லேயர் லேயராக நன்கு பிரிந்து வரும்

உள் இழுத்த எண்ணெய் சிறிது வெளியே கசிந்து ஒட்டாமல் சுருண்டு வரும் (புசுபுசுவென நுரைத்து லேயர் லேயரா எண்ணெய் தனியே பிரிந்து வரும்) போது உடனடியாக இறக்கி எண்ணெய் தடவி ரெடியா இருக்கும் தட்டில் கொட்டவும்,

பொதுவா ஸ்வீட் ஐ தட்டில் ஊற்றியதும் மேல்பகுதியை நெய் தடவிய ஸ்பூன் கொண்டு சமப்படுத்தி விடுவோம், ஆனா இதில் அதை செய்ய கூடாது, அப்படியே விட வேண்டும், ஓட்டை ஓட்டையா மேல் பகுதி இருப்பதில் தான் மேல் பகுதி மொறு மொறுப்பாகவும் நடுவில் மெதுமெதுப்பாகவும் இருக்கும், தட்டில் ஊற்றும் போது வரும் எண்ணெயும் சூட்டில் அடுப்பகுதி இழுத்து விடும்,

ஐந்து நிமிடம் கழித்து கத்தியால் துண்டுகள் போட்டு வைக்கவும் பின் 35_40 நிமிடங்கள் வரை ஆறவிடவும்

பின் அதை விட பெரிய ட்ரேயில் தலை கீழாக கவிழ்த்து ஓரங்கள் மற்றும் மேல் பகுதியை தட்டி விடவும்

துளி கூட ஒட்டாம ஊற்றிய போது இருந்த எண்ணெயை இழுத்து உடையாமல் உதிராமல் வரும்

பின் விரும்பிய வடிவில் துண்டுகள் போடவும்

மேல் பகுதி லைட் மஞ்சள் நிறம் நடுப்பகுதி லைட் சிவந்த நிறம் பார்க்கவே நன்றாக இருக்கும்

அட்டகாசமான அசத்தலான மைசூர் பாக் ரெடி தவறாமல் செய்து பாருங்கள்