மினி இட்லி சாம்பார் (Mini idli sambar recipe in tamil)

துவரம் பருப்பு மற்றும் பாசிப் பருப்பை நன்கு கழுவி குக்கரில் சேர்த்து கொள்ளவும். பருப்பை வேக வைப்பதற்கு இரண்டு கப் தண்ணீர் சேர்த்துக் கொள்ளவும்.

இதனோடு தக்காளி, மற்றும் காய்கறிகள், பூண்டை சேர்க்கவும். கூடவே அரை தேக்கரண்டி மஞ்சள் தூள் மற்றும் விளக்கெண்ணெய் சேர்த்து குக்கரை மூடி 3 விசில் விடவும்.பருப்பு வேகவைக்கும் சமயத்தில் விளக்கெண்ணெய் சேர்ப்பதால் பருப்பு நன்கு மலர்ந்து மணமாக இருக்கும்.

ஒரு மண் சட்டியில் நல்லெண்ணெய் சேர்த்து கடுகு, சீரகம், கறிவேப்பிலை, வரமிளகாய் போட்டு தாளிக்கவும்.

அதன்பின் சின்ன வெங்காயத்தை முழுதாக சேர்த்து வதக்கவும். வெங்காயம் வதங்கிய பின் அரை தேக்கரண்டி மஞ்சள் தூள் சேர்க்கவும்.

கூடவே அரைத்த சாம்பார் பொடியிலிருந்து 1.5 மேஜைக்கரண்டி சேர்க்கவும். வெந்த பருப்பு மற்றும் காய்கறிகளை கரண்டியால் லேசாக மசித்துக் கொண்டு மண்சட்டியில் சேர்த்துக்கொள்ளவும்.

மினி இட்லிக்கான சாம்பார் சிறிது நீர்க்க இருக்க வேண்டும் எனவே தேவையான அளவு தண்ணீர் சேர்த்து கூடவே புளிக் கரைசலையும் சேர்த்து நன்கு கொதிக்கவிடவும். இறுதியில் வெல்லம் சேர்த்து மல்லி இலைகளை தூவவும்.

இப்போது மினி இட்லி தட்டில் நெய் தடவிக் கொள்ளவும். நெய் தடவுவதால் இட்லி சாம்பாருடன் கலக்கும்போது நல்ல மணமாக இருக்கும். சிறிய ஸ்பூன் கொண்டு மாவினை ஊற்றி கொள்ளவும். இதனை இட்லி பாத்திரத்தில் வேகவைத்து இட்லிகளை தயார் செய்து கொள்ளவும். மினி இட்லி தட்டு இல்லை என்றால் பெரிய இட்லிகளைப் போட்டு அதனை சதுரமாக வெட்டிக் கொள்ளலாம்.

தயார் செய்த இட்லிகளை பரிமாறும் கிண்ணத்தில் சேர்த்து அதன்மேல் தேவையான அளவு சாம்பார் ஊற்றி சிறிது நெய் சேர்த்து மல்லி இலைகளை தூவி பரிமாறலாம். குழந்தைகள் விரும்பி சாப்பிடுவார்கள்.