இரண்டு டம்ளர் இட்லி அரிசி, ஒரு டம்ளர் துவரம்பருப்பு சேர்த்து 3 மணி நேரம் ஊற வைத்துக் கொள்ளவும்.(என்னால் அன்றே ஆட்ட முடியாததால் ஃப்ரிட்ஜில் வைத்து மறுநாள் காலை ஆட்டினேன்.அதனால் அடை துண்டுகள் மிகவும் மிருதுவாக இருந்தது.) இந்த இரண்டுடன் 10 வர மிளகாய் துருவிய அரை மூடித் தேங்காய் துருவல் சேர்த்துக் கொள்ளவும்.தேவையான அளவு கல்லுப்பு சேர்த்து ஒரு ஸ்பூன் சீரகம் மற்றும் சோம்பு சேர்த்து கரகரப்பாக அரைத்துக் கொள்ளவும்.

அரைத்த மாவை நன்கு கலந்து வைத்துக் கொள்ளவும். இட்லி பானையில் தண்ணீர் தேவையான அளவு சேர்த்து கொதிக்க விடவும். அதில் ஒரு கப் வைத்து அந்த கப்பில் கொஞ்சம் தண்ணீர் வைக்கவும். ஒரு தட்டில் எண்ணையை நன்கு தடவி ஆட்டிய மாவை கெட்டியாக பரத்தி விடவும்.இதை தண்ணீர் வைத்த கப்பின் மேல் வைத்து இட்லி அண்டாவை மூடி வைக்கவும். இருபதிலிருந்து இருபத்தைந்து நிமிடம் வரை வேக விடவும். பிறகு வெந்துவிட்டதா என்று பார்த்துக் கொள்ளவும். கத்திக்கொண்டு துண்டுகள் போட்டுக் கொள்ளவும்.

அடை ஆறியவுடன் தட்டை கவிழ்த்து துண்டுகளை தனியாக எடுத்துக்கொள்ளவும்.ஒரு வாணலியில் ஒரு டேபிள்ஸ்பூன் எண்ணெய் சேர்த்து காய்ந்தவுடன் அதில் பொடியாக அரிந்த பூண்டு பல் மற்றும் இஞ்சி துண்டுகள் சேர்த்து வதக்கவும். பிறகு அதில் பெரிய வெங்காயத்தை சேர்த்து வதக்கவும். பின்பு குடை மிளகாய் மற்றும் வெங்காயத்தை சேர்த்து வதக்கவும்.

ஓரளவு நிறம் மாறி வதங்கியவுடன் அதில் ஒரு ஸ்பூன் சோயா சாஸ், சில்லி சாஸ், டொமேட்டோ சாஸ், வினிகர் சேர்த்து நன்கு கலந்து விடவும். பிறகு அதை துண்டுகளை சேர்த்து கலந்து சாஸ் சுவை ஏற சிறிது நேரம் மூடி வைக்கவும். சுவையான குழந்தைகள் விரும்பும் அடை மஞ்சூரியன் ரெடி. லஞ்ச் பாக்ஸில் சூடாக வைத்து மேலே சிறிது தக்காளி சாஸ் ஊற்றி தரவும்.