सर्वप्रथम रावस माशाचे पीस करून ते स्वच्छ धुवून घ्या. कढईत/मातीच्या भांड्यात १ मोठा चमचा नारळाचं/अन्य कोणतंही नेहमीच्या वापरातलं तेल घेऊन गरम होऊ द्या. त्यात काळे मिरे, जिरं, मेथी दाणे आणि कांदा घालून परतून घ्या. कांदा जास्त ब्राऊन करायचा नाहीये, त्याचा कच्चेपणा जाईपर्यंत परतायचा आहे.

करीसाठी वाटण करायचे आहे. त्याकरिता मिक्सरमध्ये ओलं खोबरं, आलं, लसूण, कढीपत्ता, काश्मिरी लाल मिरच्या, धणे घालून वाटून घ्या. त्यातच परतलेला कांदा घालून गंधासारखी गुळगुळीत पेस्ट वाटून घ्या. वाटण करताना आवश्यकतेनुसार थोडं थोडं पाणी घाला.

आता पुन्हा एकदा त्याच मातीच्या भांड्यात/कढईत १ मोठा चमचा नारळाचं / अन्य कोणतंही नेहमीच्या वापरातलं तेल घेऊन गरम होऊ द्या. त्यात मोहरी व हळद घाला. मोहरी तडतडली की वाटण घाला आणि छान परतून घ्या. २ मिनिटे परतल्यावर त्यात मोठा पेला भरून पाणी घाला.

तयार मिश्रणात १ मोठा चमचा लाल तिखट, १ मोठा चमचा गरम मसाला आणि चवीनुसार मीठ घाला आणि दणदणीत उकळी आणा.

उकळी आल्यावर त्यात चिंचेचा कोळ व नारळाचे दूध घाला. आपली करी तयार आहे.

आता तयार करीमध्ये सर्व फिशचे पीस सोडा आणि झाकण ठेवून मंद आचेवर ७ ते ८ मिनिटे फिश शिजू द्या.

साधारणपणे ८ मिनिटांनी झाकण काढून फिश शिजलेत का ते चेक करा. आणि गरमागरम फिश वाफळणाऱ्या भातासोबत किंवा भाकरी सोबत सर्व्ह करा.