એક પેનમાં તેલ ગરમ કરી તેમાં તજ, લવિંગ, મરી, આખા મરચા અને રાઈ ઉમેરવા. રાઈ ફૂટે એટલે તેમાં જીરું, મેથી અને હીંગ ઉમેરવા. જીરું નો રંગ બદલાય એટલે તેમાં કેરીના ટુકડા ઉમેરી બરાબર હલાવી લેવું. હવે કેરીના ટુકડાને અધકચરા ચઢી જાય ત્યાં સુધી પકાવવા.

હવે તેમાં હળદર ઉમેરીને બરાબર હલાવી લેવું. છીણેલો અથવા કાપેલો ગોળ ઉમેરી ને બધું બરાબર હલાવી લેવું. વઘારિયા ને મીડીયમ તાપ પર થોડી થોડી વારે હલાવતા રહીને પકાવવું.

વઘારીયા ને એક તારની ચાસણી થાય ત્યાં સુધી પકાવવું. થોડો રસો બંને આંગળીની વચ્ચે લઈને એક તારની ચાસણી થઈ છે કે નહીં એ તપાસી લેવું. ગેસ બંધ કરીને વઘારિયા ને લગભગ ઠંડું થવા દેવું અને ત્યારબાદ તેમાં લાલ મરચું અને અથાણાનો મસાલો ઉમેરવો જેથી કરીને સરસ લાલ રંગ આવે છે. હવે તેને એક ચોખ્ખી અને સ્ટરીલાઈઝ કરેલી કાચની બરણીમાં ભરી લેવું. આ અથાણું ફ્રિજમાં થોડા મહિનાઓ સુધી સ્ટોર કરી શકાય છે.