પ્રથમ આ રીતે બધી સામગ્રી તૈયાર કરી લેવી. વાલ ને આપણે ૭-૮ કલાક પલાળવા ના હોય છે અને પછી કૂકરમાં બે થી ત્રણ સિટીમાં બાફવાના હોય છે. મેં અહી તૈયાર બાફેલા વાલ નો ઉપયોગ કર્યો છે.

વાલનું શાક ખાટું-મીઠું હોય છે. તેના માટે આંબલી અને ગોળ મા થોડું પાણી નાખી ગેસ ઉપર ગરમ મુકવુ. આંબલી સોફ્ટ થઈ જાય અને ગોળ ઓગળી જાય ત્યાં સુધી ગરમ થવા દેવું. પછી આંબલી અને ગોળ ના પાણી ને ગાળી અને તૈયાર રાખવું.

પછી આદું અને ટામેટાને મિક્સરમાં ગ્રેવી બનાવી લેવી અને લીલા મરચાને ઝીણું સમારી લેવું.

વાલ પચવામાં ભારે પડે છે એટલે અજમા અને હિંગ થી વઘાર કરવો. હવે એક પેનમાં તેલ મૂકી તેલ ગરમ થાય એટલે અજમો, જીરુ અને હિંગ નાખી વઘાર કરવો.

પછી તેમાં તમાલપત્ર અને લાલ સૂકું મરચું ઉમેરવું. વઘાર સરખી રીતે સંતળાઈ જાય પછી તેમાં એક ચમચી ચણાનો લોટ અને લસણની ચટણી ઉમેરવા. અને બન્નેને સરસ થી તેલમાં સાંતળી લેવા. ચણાનો લોટ નાખવાથી ગ્રેવી ઘટ્ટ થશે.

પછી તેમાં આદુ અને ટમેટાની પેસ્ટ ઉમેરવી અને ઝીણું સમારેલું મરચું ઉમેરી દેવું.

એક બાઉલમાં બધો મસાલો નાખી તેમાં બેથી ત્રણ ચમચી જેટલું પાણી નાખી અને બધો જ મસાલો સરસ મિક્સ કરી અને તેલમાં આ મસાલાની પેસ્ટ ઉમેરી અને સાંતળી લેવું. આ રીતે મસાલો કરીને તેલમાં સાંતળવાથી વાલના શાકનો કલર એકદમ સરસ આવે છે.

હવે જરૂર મુજબ પાણી નાખી અને ઢાંકી અને બેથી ત્રણ મિનિટ સુધી ગ્રેવીને કૂક થઈ જવા દેવી.

હવે તેમાં બાફેલા વાલ ઉમેરી બધું સરસ રીતે મિક્સ કરી એક થી બે મિનિટ સુધી પેનને ઢાંકી ને ગેસ પર રહેવા દેવું જેથી મસાલા ની બધી ફ્લેવર શાકમાં મિક્સ થઈ જાય.

હવે તેમાં તૈયાર કરેલું ગોળ આમલીનું પાણી અને 1/2ચમચી જેટલો ગરમ મસાલો ઉમેરી મિક્સ કરી લેવું પછી ગેસ બંધ કરી દેવો.

હવે તૈયાર છે આપણું વાલનું ચટપટું શાક તેને કોથમીરથી ગાર્નિશ કરી લેવું અને પૂરી અને રાઈસ સાથે સર્વ કરવું.