🎂વેનીલા કેક બેઝ બનાવવા માટે, એક બાઉલમાં મેંદો, બેકિંગ પાઉડર, બેકિંગ સોડા અને દળેલી ખાંડ ને મિક્સ કરી 1-2 વાર ચાળી લેવું.

બીજા બાઉલમાં બટર લઇ હેન્ડ વ્હીસ્કરથી બરાબર ફ્લફી થાય ત્યાં સુધી બીટ કરવું. પછી બટરમાં કન્ડેન્સ્ડ મિલ્ક નાખી ફરી ફીણવું.

તેમાં વેનીલા એસેન્સ નાખી મિક્સ કરી લેવું. પછી જે ડ્રાય મિશ્રણ છે તે ઉમેરી મિક્સ કરી લેવું. ઓવનને 170° પર 10 મિનિટ માટે પ્રિહિટ કરવા મૂકી દેવું.

હવે બનેલા મિશ્રણમાં થોડું થોડું દૂધ ઉમેરી વ્હીસ્કરથી મિક્સ કરતા જવું. બહુ ફીણવાનું નથી. ખાલી મિક્સ જ કરવાનું છે. રેડવાથી બહુ જ ધીમે પડે તેવું બેટર હોવું જોઇએ. કેક મોલ્ડમાં માપનું કાપીને બટર પેપર પાથરવું.

ઓવનમાં મૂકવાનું હોય તેની પહેલા જ બનેલા કેક મિશ્રણમાં વિનેગર ઉમેરી બરાબર મિક્સ કરવું. સોડા સાથે રિએક્ટ થઇ મિશ્રણ ફૂલશે. તરત જ તેને કેક ટીનમાં ઠાલવી દેવું. 1-2 વાર ઠપકારી એરબબલ હોય તે કાઢી લેવા. પ્રિહિટેડ ઓવનમાં મોલ્ડ ગોઠવી 35-40 મિનિટ માટે 170° પર કેક બેક કરવી. થઇ છે કે નહીં એ ટુથપીકથી ચેક કરવું.

15 મિનિટ ઠંડી કરી કેક અનમોલ્ડ કરવી. અને બીજા કલાક માટે ઠંડી થવા દેવી.

🎂🍫ચોકલેટ કેક બેઝ બનાવવા માટે, ઉપર વેનીલા બેઝની જેમ જ બનાવવાની છે. ફક્ત કોકો પાઉડર ને ડ્રાય મિશ્રણ માં મિક્સ કરી ચાળી લેવાનો છે. બાકીની પધ્ધતિ એક સરખી છે. તેને પણ 1 કલાક જેવી ઠંડી કરી લેવી.

કેક પર છાંટવા માટે 2 ભાગ પાણી અને 1 ભાગ ખાંડ લઇ 5 મિનિટ ગરમ કરી ખાંડ સીરપ બનાવવો.કેક જો ઉપરથી કડક થઇ હોય તો પાતળી સપાટી કાપી લેવી.પછી બન્ને કેકને બે આડા કાપા કરી ફોટોમાં બતાવ્યા પ્રમાણે ત્રણ લેયરમાં કાપી લેવી. વ્હીપીંગ ક્રિમને બીટરથી બીટ કરી નોનડ્રોપીંગ વ્હીપ્ડ ક્રિમ બનાવી લેવું.

હવે એક મિડિયમ અને એક નાના ગોળ કટરથી દરેક કેકના લેયરને ફોટોમાં બતાવ્યા પ્રમાણે ત્રણ રીંગમાં કાપવા.

એક નાના બાઉલમાં ફ્રેશ ક્રીમ લઇ તેને 2 મિનિટ માટે માઇક્રોવેવ કરવું કે ગેસ પર ગરમ કરી લેવું. તેમાં ડાર્ક ચોકલેટના નાના ટુકડા નાખવા. થોડી વાર એમ રહેવા દઇ બરાબર હલાવી મિક્સ કરી લેવું. ચોકલેટ ઓગળી જવી જોઈએ ક્રિમમાં. જે બનશે તેને ચોકલેટ ગનાશ કહેવાય. તેને ઠંડું થવા દેવું.

હવે ટર્ન ટેબલ પર પહેલા ચોકલેટ કેકની રીંગ મૂકી તેની અંદર વેનીલા કેકની રીંગ અને તેની અંદર ચોકલેટ કેક ગોઠવવી. ઉપર ખાંડ સીરપ છાંટવો. બનાવેલું વ્હીપ્ડ ક્રીમ એકસરખું પાથરી લેવું. તેની પર વેનીલા કેકની રીંગ બહાર, પછી ચોકલેટ કેકની રીંગ અને અંદર વેનીલા કેક ગોઠવવી. ખાંડ સીરપ છાંટવો. ફરી વ્હીપ્ડ ક્રિમનું લેયર કરવું. આ રીતે 6 લેયર સુધી ઓડ-ઇવન ગોઠવતા જવું અને ક્રીમ લગાવતા જવું.

આખી કેકની ચારે તરફ પણ સારું એવું ક્રીમ લગાવી જાડું, સ્મૂધ લેયર કરવું. વ્હીપ્ડ ક્રિમને પાઇપીંગ બેગમાં ભરી નીચે કિનારી પર ડિઝાઇન બનાવવી. તે જ રીતે ચોકલેટ ગનાશને પાઇપીંગ બેગમાં ભરી નીચે નાનું કાણું કરી કેકની કિનારી પર થોડા થોડા અંતરે મૂકતા જઇ ડ્રોપિંગ ઇફેક્ટ આપવી. કેકની ઉપરની સપાટી પર પણ ગનાશ પાથરવું. તેની પર સ્ટાર નોઝલથી વ્હીપ્ડ ક્રીમ ની પેટર્ન બનાવવી. અને ચોકલેટ બોલ્સ, વેફર સ્ટીક્સથી ડેકોરેટ કરવું. કેક તૈયાર છે. એકાદ કલાક માટે ફ્રીઝમાં સેટ થવા દેવી.

કટ કરવાથી અંદર ચેક્સ ની પેટર્ન બનશે. સાથે બે અલગ યમી ફ્લેવર એક સાથે ખાઇ શકાશે. બે કેકમાંથી એક બનાવી હોવાથી લગભગ 2 કિલોગ્રામ જેવી બનશે. 15-20 વ્યક્તિ ખાઇ શકશે.