બધા શાકભાજીને ધોઈને કાપી લેવા. બાસમતી ભાત રાંધી લેવો. પાલકને ધોઈને બાફી ને તેની પેસ્ટ બનાવી લેવી. વધેલી પાલક પનીર ની ગ્રેવી પણ વાપરી શકાય.

એક પોટ માં તેલ ગરમ થાય એટલે તેમાં તમાલપત્ર, તજ, લવિંગ અને ઇલાયચી ઉમેરવા. હવે તેમાં પાતળા અને લાંબા સમારેલા કાંદા ઉમેરી ને હલકા બ્રાઉન કલરના સાંતળવા. હવે તેમાં આદુ, લસણ અને લીલા મરચાની પેસ્ટ ઉમેરીને એક મિનીટ સુધી પકાવવું. હવે તેમાં બધા શાકભાજી ઉમેરી બરાબર હલાવી લેવું. લાલ મરચું, હળદર, ગરમ મસાલો અને મીઠું ઉમેરીને બરાબર હલાવી લેવું.

હવે તેમાં તૈયાર કરેલી પાલકની પેસ્ટ ઉમેરવી અને ઢાંકીને બધા શાકભાજી ચડી જાય પણ થોડા કડક રહે એ રીતે પકાવી લેવું. આ પુલાવ બનાવવા માટે પાલક પનીર ની વધેલી ગ્રેવી પણ વાપરી શકાય. મેં અહીંયા વધેલી પાલક પનીર ગ્રેવી નો ઉપયોગ કર્યો છે. હવે તેમાં પનીરના ટુકડા ઉમેરીને બધું બરાબર મિક્સ કરીને ત્રણથી ચાર મિનિટ સુધી મીડીયમ તાપે પકાવવું.